As y os educadors d’o COA irán a la vaga

A plantilla d'o COA considera que os retalles de presupuesto, a falta d'educadors y l'aumento d'as suyas funcions mete en periglo a ninos y adolescents

Medio centenar d'educadors y educadoras se concentroron iste luns frent a la siede de l'IASS en Zaragoza. Foto: CGT

Medio centenar d’educadors y educadoras se concentroron iste luns frent a la siede de l’IASS en Zaragoza. Foto: CGT

As y os treballadors d’o Centro d’Observación y Acullida (COA) chestionau por a Fundación d’Aduya Integral a o Menor (FAIM), un d’as que s’encargan d’albergar a os menors tutelaus por os Servicios Socials d’a DChA, irán a la vaga. Una decisión presa iste luns por votación en l’asambleya d’a plantilla. Ista será a primer vez que un centro de protección de menors d’Aragón se declara en vaga.

Os y as educadors se concentroron en o maitín d’iste luns frent a la siede d’o IASS en o Paseu María Agustín de Zaragoza, arropaus por medio centenar de personas, pa exichir a paralización y corrección d’os nuevos pliegos de condicions d’o COA -publicaus o pasau 3 d’octubre- y d’a resta de recursos, aumento d’a partida presupuestaria y d’o numero d’educadors d’atención directa, que os gastos de mantención d’os ninos y ninas sían asumius por as institucions publicas y que o Gubierno d’Aragón cumpla con a lechislación vichent, en que se dicta que “os presupuestos pa l’atención y protección de menors no pueden retallar-se baixo garra concepto -Articlo 5 d’a lei d’infancia y adolescencia en Aragón-“.

A concentración fació honra, amás, pa fer entrega d’as alegacions aprebadas por o comité d’interpresa de FAIM a os pliegos. Entre a protesta se leyó un manifiesto redactau por as y os treballadors y s’anuncioron mas movilizacions.

A plantilla d’o COA afirma que o retalle presupuestario, l’aumento d’as funcions y a diminución d’o numero d’educadors suposa meter en alto risgo a protección a istes ninos, ninas y adolescents. A temor d’os educadors a no poder guarenciar a integridat, seguranza y una buena atención a os ninos y ninas les ha feito denunciar iste feito publicament, a presentar alegacions a istes pliegos y agora a recurrir a la vaga.

Fuent: http://arainfo.org/2014/10/las-y-los-educadores-del-coa-iran-a-la-huelga/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.