As zonas afectadas por as creixidas prencipian a recuperar a normalidat

A situación en a val de Benás y en a val d'Arán se normaliza dimpués d'a baixada en a cantidat de precipitacions de nueitz y a millora de l'orache hue

defensas benas

Defensas arrancadas en Benás. Foto: InfoBenasque (https://twitter.com/InfoBenasque)

O cabal d’os ríos ha disminuiu dimpués de baixar a cantidat d’as precipitacions mientres ista nueit y o maitín de hue. A zona mas afectada en Aragón ye a val de Benás a on o río Esera sufrió una important creixida. L’alcalde de Benás, un d’os municipios mas afectaus, considera que “a situación s’ha estabilizau”.

En istos momentos se treballa por recuperar a normalidat en as comunicacions por carretera y os servicios d’augua potable y luz. Fundamentalment, bombers, Protección Civil, Guardia Civil y a Unidat Militar d’Emerchencias (UME) son treballando ta recuperar a normalidat en os municipios afectaus, fundamentalment Benás, Castillón de Sos y Grist.

S’aspera que s’ubran en breu as carreteras (A-139 y N-260) en os tramos afectaus de Benás, Castillón de Sos y Grist, mientres a electricidat ye quasi de raso restableixida pero no pas l’augua potable. Se suministra augua potable mediant botellas transportadas en cambions. Tanimientres, d’os 300 vecins desaloixaus en Benás, bellas decenas encara son asperando ta tornar ta casa suya. Os arquitectos son inspeccionando os edificios afectaus ta comprobar si i hai danyos en a estabilidat d’os mesmos.

UME

A UME se desplega en Grist. Foto: InfoBenasque (https://twitter.com/InfoBenasque)

A presidenta aragonesa, Luisa F. Rudi visitará hue a zona. Tamién se i desplazarán os Directors Chenerals de Carreteras, de Chestión Forestal, de Conservación d’o Medio Natural y de l’Instituto de l’Augua.

Encara que se mantienen alertas por plevias y deschelos, no s’asperan graus complicacions, manimenos se cusira o cabal d’o Galligo y o cabal d’a Cinca en pasar por Fraga, pues a Esera ye afluent d’a Cinca.

Tamién millora a situación en a Val d’Arán

val d'Arán

Población engaronada en a Val d’Arán. Foto: Jornalet

Seguntes informan Vilaweb y Jornalet, ha millorau tamién a situación en a Val d’Arán y en atras vals occitanas, que tamién vivioron momentos criticos por a creixida d’a Garona y o Nere. Encara i quedan 300 personas sin poder tornar ta casa suya, asinas como bellas personas sin luz ni gas, encara que china-chana se irán restableixendo os servicios. As carreteras N-230, N-141, C-28, C-13 (nomás ta trafico pesau) y L-500 son encara trancadas.

O casco antigo de Viella estió evacuau asinas como as localidatz de Sant Beat, Banhèras de Luishon, Sales e Pratvièlh y Hòs que estioron evacuadas por tierra y aire. En Lourdes s’habió de zarrar o santuario y a linia de tren entre Pau y Tarbes se viyó afectada y se producioron prous danyos en Comenge y Bigòrra. L’agricultura y a ganadería tamién se viyoron prou afectadas.

O Síndic d’Arán, Carlos Barrera, lamenta as “perdas descomunals“, manimenos considera que a previsión y o marguin ta parar-se “ha feito que no i haiga habiu garra victima mortal, que ye o mas important”.

Una rispuesta a As zonas afectadas por as creixidas prencipian a recuperar a normalidat

  1. Pingback: As zonas afectadas por as creixidas prencipian a recuperar a normalidat | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.