Asaja y o Concello de Fraga organizan una chornada internacional hortofruiticola

Ista chornada permitirá analisar a problematica actual d'o sector

Presentación d'a chornada. (Foto: Concello de Fraga)

A organización Asaja, chunto a o Concello de Fraga, han organizau en a capital d’o Baixo Cinca t’o viernes venient una chornada internacional hortofruiticola. A mesma permitirá analisar a problematica actual d’o sector y proposar sistemas de respuesta eficaces a situacions de crisis de sobreufierta como a vivida entre o pasau verano, que obligó a adoptar midas como a retirada de fruita t’a suya conversión en compost que implican un elevau coste economico y social t’os productors y o país.

O programa d’a chornada ranca a las 12.00 horas con una reunión en o Concello de Fraga en a qual prenerán parti productors y representants de l’administración t’analisar a complicada campanya de 2011 y valurar a o tiempo as perspectivas que se presientan ta 2012. De tardis, y dimpués d’unatra reunión tecnica previa, plegará en o Castiello de Fraga l’inte d’as charradas, que rancan a las 18.45 con l’analís que Jesús Nogués ferá d’as implicacións que a PAC 2014 tiene t’o sector hortofruiticola y Bruno DuPont aportará la suya anviesta sobre a necesaria coordinación que Francia, Espanya y Italia –os países que producen quasi o 70% d’as fruita dulza d’a UE- han d’aconseguir t’a esfensa d’uns productors que, en muitos casos, tienen intréses comúns.

Dimpués d’ell, intervendrá Juan José Orriés, director de MercoFraga, t’amostrar l’anviesta d’as Organizacións de Productors de Fruitas y Hortalicias (*OPFH) y zarrará as ponencias Ramón Portolés, o representant de Asaja Nacional de Fruitas y Hortalicias en o Comité Mixto Hispano-Franco-Italián, con una analís d’a pasada campanya y d’as perspectivas que se presientan t’a proxima. Por zaguer, Ángel Samper, o secretario cheneral de Asaja Aragón, exposará as conclusións d’a chornada ta consignarlas dimpués en documento que dimpués s’entregará a o ministro d’Agricultura, Miguel Arias Cañete, entre a Chunta Nacional que Asaja celebra iste mes de febrero en Madrit.

A decisión de celebrar a chornada en Fraga parte d’o compromiso que o Concello d’a ciudat mantiene con un sector que, han recordau l’alcalde de Fraga, Santiago Escándil, y o consellero delegau d’Agricultura d’o consistorio baixocinquenyo, José Ignacio Gramún, ye o motor d’a economía fragatina y sin  l’aportación d’o qual perdería buena parte d’a suya prochección futura: “Treballamos duro t’aconseguir que s’instalen en Fraga nuevas interpresas, pero tenemos claro que no i hai millor inversión t’asegurar o futuro d’a ciudat que o desembolique d’os nuevos regadíos”, ha explicau l’alcalde.

A la chornada ye previsto que acudan amán de docientos representants de productors fruiticolas d’Aragón y comunidatz autonomas vecinas y representants d’as administracions competents y a suya celebración ye posible gracias a la colaboración d’entidatz como MercoFraga, Excofrut, DKV Seguros y o Gubierno d’Aragón. “O marco financiero d’a nueva PAC ye de 420.000 millóns d’euros, pero solament se destinan 3.900 a chestión de crisi”, ha comentau o secretario cheneral de Asaja Aragón. Amás, ha concluiu asegurando que asinas s’aconseguirá “que no i haiga especulación de garra tipo y se beneficie o consumidor final”.

Fuent: http://www.comarcas.es/index.php/mod.noticias/mem.detalle/idnoticia.6650/relcategoria./chk.13769d095850e7bee7b19cd7308b1787.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.