Asesinan a una diputada laborista en o Reino Uniu en a campanya d’o “Brexit”

Un hombre de 52 anyos d'ideolochía d'extrema dreita ye acusau d'o crimen

Foto: Wikipedia

Jo Cox. Foto: Wikipedia

A diputada d’o Partiu Laborista britanico, Jo Cox, fue asesinada ahiere dimpués de recibir dos disparos y qualques punyaladas mientres celebraba un acto d’a campanya por o referendum sobre a salida u permanencia d’o Reino Uniu en a Unión Europea. O suceso ocurrió en a biblioteca de Birstall, cerca de Leeds.

Un hombre de 52 anyos fue deteniu como presunto autor de l’asesinato, Tommy Mair, que habría chilau “Britain first” (Gran Bretanya primero), que podría referir-se a o nombre d’un partiu faixista britanico amás d’un lema antiimmigrants. L’hombre yera partidario d’o partiu neonazi estadounidense National Alliance (NA). O suyo chirmán reconoixió que teneba “historial de malotía mental“. As verdaderas motivacions d’o crimen encara se desconoixen.

A campanya por o referendum d’o “Brexit” s’ha suspendiu. O Primer Ministro britanico, o conservador David Cameron, suspendió un mitín que iba a fer en Chibraltar ahiere en conoixer a fatal noticia. Os diferents liders politicos britanicos han amostrau as suyas condolencias.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.