Atentau contra a candidata independentista que ha ganau as eleccions en Quebec

O Partiu Quebequés gana as eleccions. Atentan contra a ganadora mientres feba o discurso

Pauline Marois mientres a campanya (Foto: Wikipedia)

Pauline Marois mientres a campanya (Foto: Wikipedia)

O soberanimo ha ganau as eleccions feitas o martes en Quebec, como apuntaban os sondeus. Ista maitinada, hora d’aquí, Pauline Marois, a que será a nueva primer ministra, yera fendo o discurso de victoria, quan un individuo ha prebau d’atentar contra a suya vida. Encara que a ella no l’ha pasau cosa, bi ha habiu un muerto y una persona seriament ferida en l’atentau. Totz doz son tecnicos que yeran treballando-ie. L’atacant ye estau preso de camín por a policia y endrezau ent’a comisaría.O partiu Quebequés yera, en ixe inte, celebrando a suya tornada t’o poder dimpués de conseguir 54 escanyos en l’Asambleya Nacional. A mayoría absoluta ye de 62 escanyos. Iste partiu quier fer un referendum d’independencia, como los que ya se facioron en 1980 y 1995, que desepararía Quebec de Canada.

En segundo puesto con 50 representants s’ha quedau o Partiu Liberal, qui son agora mesmo en o poder y qui quieren que Quebec contine estando parti de Canada. Avenir Quebec queda como tercer fuerza con 19 diputaus. Con iste partiu habría de pactar o Partiu Quebequés ta poder fer o referendum, en no tener mayoría absoluta. Por agora son partidarios de deixar a consulta ta más enta debant.

As eleccions s’habioron d’enantar quince meses dimpués de arrienda casos de corrupción aintro d’o Partiu Liberal, que gubernaba Quebec dica agora y de una gran movilización estudiantil que han manteniu a luita mientres más de quatre meses de vaca indefinida en as principals universidatz d’o país.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.