Atra nueit de disturbios policials en Zaragoza

A policía tornó a rodiar o vico d'a Madalena y a enrestir por as carreras d'o centro d'a ciudat

Lectura d'o manifiesto

Lectura d’o manifiesto

Encara que a manifestación d’iste sabado, convocada ta refusar as actuacions policials d’os diyas 17 a 19 de chenero en Zaragoza, transcurrió pacificament de tot, a nueit continó con disturbios que prencipioron bell rato dimpués d’a manifestación quan a policía enristió por a carrera Don Chaime, debant d’uns ciudadans ixorrontaus y sorprendius.

A manifestación, que arrocló a millars de personas, prencipió en o Paraninfo y traviesó o Paseu Independencia y a Carrera Alfonso ta rematar debant d’a Delegación d’o Gubierno espanyol en Aragón. A presencia policial tornó a estar a-saber-lo fura, con más de vinte furgons policials presents rodiando o Paseu Independencia y decenas de achents curisando l’edificio de Delegación. A manifestación refusaba o papel d’a policía en a represión que bi habió o cabo de semana pasau contra una atra manifestación que refirmaba a luita d’os vecins de Gamonal, en Burgos. Asociacions de vecins, partius politicos y movimientos socials de todas mena demandoron, una vegada más, a dimisión de Gustavo Alcalde, Delegau d’o Gubierno espanyol, y responsable alavez d’a policía espanyola y as suyas actuacions. En a lectura d’o manifiesto i participó tamién un representant d’a Plataforma en esfensa de Averly, demandando a protección d’ixe patrimonio.

Poco dimpués de rematar-se a manifestación, o dispositivo policial se trasladaba t’o vico d’a Madalena y t’as carreras d’o Coso, Plaza Sant Pietro Nolasco y carrera Sant Vicent de Paul. En Don Chaime se facioron as primers enrestidas contra os ciudadans que i yeran, repetindo-se en atras carreras, y tornando-se a viyer imachens d’un vico ocupau por a policía, armada con escopetas y escudos. Unatra vegada o hashtag #SitiosDeZaragoza prenió firme presencia en os retes socials.

Mientres prous horas a Madalena continó con a fuerte presencia policial. Dende os bars y locals d’o vico se chiloron consignas contra la policía y Gustavo Alcalde. A nueit remató con cinco personas detenidas, tres d’ellas menors d’edat.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.