Atro tresorer d’o PP imputau por blanqueyo de diners

O chuez Pablo Ruz acusa a Ángel Sanchís d'aduyar a Luis Bárcenas a amagar a fortuna que teneba en bancos suizos.

Ángel Sanchís (Foto: Eldiario.es)

Ángel Sanchís (Foto: Eldiario.es)

O PP ya tien imputaus por balqueyo de capitals a los que estioron os suyos tres tresorers dica que surtió o escandalo d’a trama Gürtel. O chuez Pablo Ruz dio iste lunes un trango más y en un auto conoixiu iste martes acusa a Ángel Sanchís (extresorer de Alianza Popular y embrecau en o clamau “caso Naseir”) de haber aduyau a Luis Bárcenas a amagar a fortuna que teneba en bancos suizos. Chunto a los dos ye d’a mesma traza imputau Álvaro Lapuerta, de 85 anyadas, qui ya declaró en l’Audiencia Nacional 0 pasau viernes 22. Sanchís ye estau citau ta declarar como imputau o venient diya 10 d’abril.

O machistrau diz en o suyo auto que Sanchís contactó con os bancos a on que Bárcenas plegó a amagar dica 38 millons d’euros ta transferir os suyos fundos ta una cuenta d’a sociedat Brixco S.A. en o HSBC Bank USA en Estaus Unius, que o chuez ha alcordau bloqueyar chunto a totz os suyo activos financieras. D’alcuerdo con a documentación remitida por as autoridatz d’EE. UU. o saldo de Brixco en o debandito banco baixó 100.000 dolars a semana pasada. Brixco ye una interpresa d’Uruguay que chestiona as exportacions de limons que fa la finca La Moraleja (Archentina), propiedat de Sanchís, que niega tener atra relación con ella dillá d’a comercial. O extresorer reconoixió d’antis a eldiario.es que metió en contacto a Bárcenas con Brixco porque a la companyía le caleban diners y o suyo companyer de partiu le’n ampró.

Sanchís visitó o banco a on que Bárcenas amagaba os suyos diners en Suiza o 20 de febrer de 2009, pocos diyas dimpués de que o machistrau Baltasar Garzón, alavez instructor d’o “caso Gürtel”, detenese a Francisco Correa y a los principals imputaus d’a trama de corrupción vinclada a o PP. Seguntes a suya versión, Bárcenas s’enteró d’o suyo viache ta Suiza y le demandó que pasase por o banco ta viyer como yeran as suyas inversions.

Ruz ha decidiu tamién de bloqueyar os biens que tien en a mesma entidat a sociedat Rumagol S.A. y la de Hilgart Investments LTD en a oficina de Bancaja en Miami. Ista cuenta tien como beneficiario economico a Francisco Correa y s’habría nutriu en gran parti de fundos venients presuntament d’as adchudicacions irregulars d’achustes publicos. T’amagar l’orichen real d’os diners se trestalloron os ingresos en diferents transferencias emitidas por diferents personas.

Sobre Rumagol, o instructor ha alcordau enamplar a comisión rogatoria endrezada t’as autoridatz d’EE.UU. ta que le facilite información detallada sobre Rumagol S.A., entre ella, la identidat d’os suyo titulars, apoderaus y beneficiario zaguer; ampres y hipotecas, caixas de seguridat; bonos d’o Tresoro; tarchetas de credito u debito; crompas de cheques bancariosy qualsiquier atra información existent sobre alcuerdo u ordens dadas relacionadas con os activos d’a interpresa.

Fuent: http://www.eldiario.es/politica/Ruz-Angel-Sanchis-blanqueo-dinero_0_115138552.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.