Auguaviva se manifiesta contra o prochecto d’entibo en o río Alcherez

Gran afluencia en a manifestación contra o prochecto d'entibo d'a CHE en o río Alcherez en Auguaviva

Muro humano en Auguaviva. Foto: AraInfo

Muro humano en Auguaviva. Foto: AraInfo

A localidat d’Auguaviva se manifestó o pasau sabado en contra d’o prochecto d’a Confederación Hidrografica de l’Ebro (CHE) d’un entibo de laminación en o río Alcherez. Arredol de mil personas i asistioron, tanto d’a localidat como d’atros puntos d’Aragón, Catalunya y Valencia. Destacar a presencia de miembros de qualques partius politicos, sindicatos y atras organizacions como CHA, IU, Puyalón de Cuchas, Purna, SOA Baixo Aragón u COAGRET. A manifestación yera convocada por a plataforma “El Bergantes no se toca“.

A las 18 h. en a Pza. d’o Concello, as asistents levantoron un muro humano contra iste prochecto, con una pancarta prencipal en que podeba leyer-se “Iste ye o entibo d’Auguaviva. No pasarán!“, chunto a atras pancartas en defensa d’o río, en castellano y catalán y banderas d’Aragón. Un ixambre de chent vestida con a camiseta blanca d’a plataforma con o lema “Salvem lo nostre riu” marchó a las 18:30 h. en manifestación ent’a chopera La Catalina, a uns 2 km. d’o lugar y a tasos metros d’a on se quiere fer o entibo, que tendría uns 70 metros d’altaria. Astí se repartió lazos azuls a on as asistents escribioron sobre a suya relación con o río Alcherez, unindo-los pa deixar claro o suyo refuse a o prochecto.

Dende a plataforma “El Bergantes no se toca”, seguntes declaracions a AraInfo, consideran que o entibo sería una estrafalla pa la localidat “por as multiples expropiacions de torres ganaderas y agricolas que suposaría, amás de l’impacto sobre o turismo y de l’atentau ecolochico y social que suposa o entibo de laminación prochectau”. Pa ells “o río forma una parte muit especial d’a vida d’os habitants d’a redolada” y “i hai alternativas a o entibo, como podrían estar nuevos aliviaders en o entibo de Calanda u construir o de Santoleya. O que no tien sentiu ye fer un nuevo entibo mas gran que no os dos chuntos, y muito menos pa laminar flumens como preban de chustificar dende a CHE”. Entre os vecins y vecinas d’a redolada, se replegoron 3.300 sinyaduras en contra d’iste prochecto.

Una rispuesta a Auguaviva se manifiesta contra o prochecto d’entibo en o río Alcherez

  1. Os adrezco el compartir con todos nosotros toda esta interesante información. Con estos granitos de arena hacemos màs grande la montaña Internet. Enhorabuena por este post.

    Saludos

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.