Auguaviva y Artieda celebran o sabado una chornada de chirmanamiento

Iste chirmanamiento busca "simbolizar a solidaridat entre dos lugars que viven baixo a mesma menaza".

Cartel d'os actos previstos t'a chornada.

Cartel d’os actos previstos t’a chornada.

Iste sabado 13 de setiembre os concellos d’Artieda (Chacetania) y Auguaviva (Baixo Aragón) sinyarán o suyo chirmanamiento y, ta conmemorar-lo, o Concello d’Auguaviva con a colaboración d’a plataforma O Bergantes no se toca y asociacions locals, ha preparau un completo programa d’actos.

A chornada prencipiará arredol d’o meyodía, quan a Corporación local recibirá a la delegación que se desplace dende Artieda ta, contino, visitar quantos paraches d’o río Bergantes. A las 13.30 horas tendrá puesto l’Acto Oficial de Chirmanamiento y, posteriorment, se celebrará una chenta popular t’os vecins y vecinas de totz dos lugars y totz aquells que deseyen acompanyar-les en iste día tant especial.

Sobre as 17.00 horas continará l’actividat con a devantadera d’o Parque-Mirador d’a Dignidat d’os Lugars, un chicot y simbolico espacio que o Concello d’Auguaviva ha acondicionau chunto a o Puente de l’Arenal sobre o río Bergantes, muit amán d’a ubicación prevista t’a presa que prochecta a Confederación Hidrografica de l’Ebro. En ell se rendirá homenache a totz aquells lugars que s’han visto en una situación similar a la qual esnavesa en l’actualidat o municipio baixoaragonés. Contino se prochectará en a Casa de Cultura o documental Bergantes: lo riu menut, “dedicau en especial ta que os artiedanos puedan conoixer millor o estau d’a problematica”, sinyalan dende o Concello d’Auguaviva. Ta redondiar y concluir a chornada, os presents desfrutarán de l’actuación d’a Ronda de Boltaña dende as 19.00 horas en a plaza d’Espanya.

Iste chirmanamiento busca “simbolizar a solidaridat entre dos lugars que viven baixo a mesma menaza, a construcción de senglos pantanos que rematarían con a vida d’istes municipios, os quals veyerían anegau o suyo esdevenidero baixo as auguas entibadas”. “Amás -adhiben-, se da a circumstancia de cómo dende a Confederación se fa servir en la uno y l’atro caso l’argumento d’a seguranza seguntes o suyo intrés. En l’entibo de Yesa, se mira d’amagarr l’enorme periglo existent por os movimientos d’a ladera que provocan as obras d’o recrexedura y que fa poco han forzau a expropiación d’as suyas viviendas a decenas de vecins. Entremistanto, en o Bergantes s’ha mirau de creyar una alarma de raso sobredimensionada y inchustificada en os lugars abaixo d’a presa de Calanda, por os problemas de seguranza d’ista debant d’eventuals creixidas””.

Fuent: http://arainfo.org/2014/09/aguaviva-y-artieda-celebran-este-sabado-su-hermanamiento-en-una-intensa-jornada/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.