Aumentan os ataques a homosexuals rusos debant d’o silencio d’o Kremlin

O colectivo LGTB Spectrum Human Rights Alliance denuncia a impunidat d'os crimens y o silencio d'o Kremlin, que fa un mes aprebó una lei que vieda a propaganda homosexual

Manifestación LGTB en Rusia. Foto: Tribunus (CC 0)

Manifestación LGTB en Rusia. Foto: Tribunus (CC 0)

A lei d’o silencio impera en Rusia por o que fa a os dreitos d’os homosexuals. Asinas l’aseguran qualques plataformas LGTB debant d’o zarpau d’agresions por parte de collas neonazis como “Occupy Pedofilyaj”. Tamién denuncian a permisividat policial y estatal por parte d’o Gubierno Ruso, que fa un mes aprebó una lei que vieda a “propaganda homosexual”. Asinas, o colectivo Spectrum Human Rights Alliance asegura que un choven ha estau asasinau a mans d’o citau grupo y que encara no se’n han depurau responsabilidatz penals.A dolenta acción constituye o zaguer capitol d’una serie d’agesions a mans de collas neonazis cometidas en os zaguers meses. Uns actos vandalicos que os propios perpretadors no dubdan en espardir por os retz socials, tal como replega a web de Spectrum Human Rights Alliance. En un d’ixos vidios amaneixe l’activista Artem Gorodilov raptau por os neonazis y sozmeso a continos movimientos violentos y moflas en o fosal local de Kamensk-Uralsky. Os suyos seqüestradors le obligan a situar-se sobre a fuesa d’un choven que s’heba suicidau meses antis a causa de semellants coaccions. Gorodilov tamién ye victima d’un segundo vidio en o qual s’observa cómo una colla de chovens le aventan un vaso de plastico que contiene pixaus.

Emparaus por a permisividat gubernamental

L’aprebación por parte d’o Kremlin d’una lei que condena a “propaganda homosexual” ha provocau denuncias y criticas de plataformas LGTB. Dita norma estipula pinyoras de dica 31.000 dolars, pendendo de l’achent que la infrinche. En caso que os infractores sían extranchers, a lei preveye pinyoras y deportación u 15 días d’arresto administrativo.

As manifestacions convocadas con motivo d’o Día de l’Argüello Gai constituyoron atro punto de fricción entre os activistas y o Kremlin. Iste viedó numerosas marchas que estioron desoyidas por muitos manifestants. O pre que habioron de pagar estioron as indiscriminadas detencions y as agresions por parte d’os extremistas.

L’executivo de Putin ha sobatiu asinas un clima hostil ent’o colectivo LGTB, en una socidat ya de por sí contraria a la reconoixencia d’os suyos dreitos. Asinas, un estudeo d’o Pew Research Center sinyala que o 74% d’os rusos repulsan a homosexualidat.

Fuent: http://www.eldiario.es/sociedad/Aumentan-ataques-homosexuales-silencio-Kremlin_0_162384179.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.