Aventura aragonesa en o Campionato d’Europa de bikepolo

Dos equipos zaragozanos se desplazoron ta París ta disputar o Campionato Europeu de Bikepolo en chulio. Gipsy Kings en o torneu clasificatorio y Defensores en l'europeu

Gipsy Kings (Foto: Bikepolo Zaragoza)

Os pasaus 19, 20, 21 de chulio se celebró o Campionato Europeu de Bike Polo en a ciudat d’as luces y as uembras, París. O torneu contó con a presencia de dos equipos aragoneses, asinas como de bellas personas acompanyants. En concreto os Gipsy Kings que chugoron o torneu pre-europeu de clasificación, y os Defensores que chugoron l’europeu.

O chueves 19 prencipioron ista aventura europea (ista interpresa manya en Europa) os Gipsy Kings. Os suyos partius se celebroron en l’increyible scenario de Les Invalides, en pleno centro de París. L’obchectivo yera claro, buscar a clasificación t’o campionato europeu. L’equipo compuesto por “El Capitán”, Borxa y “Little John” luitó con rasmia totz os suyos partius frent a grans equipos d’a resta d’Europa. Desplegoron un buen chuego, y a cucha de “Little John” metió en apuros a totz os suyos contrincants. A tamás d’a suya entrega en os 6 partius disputaus, nomás podioron imposar-se-ne en un, o que no les permitió clasificar-se.

O viernes 20 estió o turno ta Defensores (“Dinamita”, Pablo, “Danman”) en o campionato europeu. Debant d’ells os millors chugadors de bikepolo d’Europa. Entre os equipos d’o suyo grupo se’n trobaban beluns como os suizos L’equipe (campions d’Europa 2011) y os franceses Call Me Daddy (subcampions mundials). Debant d’iste panorama as expectativas yeran fer-lo o millor posible, luitar, aprender d’os millors y pasar-lo bien.

Defensores (Foto: Bikepolo Zaragoza)

O primer partiu concaró a Defensores con os que a la fin vencerían o campionato, Call Me Daddy. Poco podioron fer debant d’o lurte de chuego y velocidat que desplegoron os franceses. A lo menos fació honra ta apreciar dende dentro a qué ran se puede plegar a chugar a bikepolo. No podioron ganar dengún d’os 7 partius disputaus. Manimenos, en 3 d’ells tenioron serias opcions d’imposar-se realizando un millor chuego y mayors ocasions que no os suyos contrincants, encara que finalment no se materializoron en un resultau positivo. D’o millor d’os partius disputaus estió a rasmia que contrimostroron ta suplir as esferencias con equipos millors, y as grans paradas y esfensas realizadas (fendo honor a o suyo nombre) que facioron disfrutar a o publico.

Foto: Bikepolo Zaragoza

No tot estió perder.

A expedición aragonesa venció de forma aclapadora en estar a millor afición d’o campionato. Dengún no animó tanto y tant bien mientres totz os diyas. En tot momento Gipsy Kings y Defensores recibioron os millors animos de l’afición manya. Mesmo ya eliminaus, mientres as rondas finals d’o sabado estioron l’afición mas ruidosa, podendo-se sentir cantos en tot o campo de “ALE Bikepolo Zaragoza!” Y a presencia de l’unico sinyal, l’aragonés, en o partiu d’a final con a inscripción de: “Os Alicates en ruta” que sin dubda veyerá meyo mundo.

http://www.ehbpc.org/2012/
http://bikepolozaragoza.blogspot.com.es/

http://es.wikipedia.org/wiki/Bicipolo

 

Una rispuesta a Aventura aragonesa en o Campionato d’Europa de bikepolo

  1. Pingback: SÁBADO DE IMPRESIÓN EN LCDB: Mundial de Bike Polo y Vuelta 2012 |

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.