Azawad: o MNLA ha prencipiau una ofensiva militar contra as collas islamistas

O MNLA preba de forachitar d'Azawad (antigo norte de Mali) a collas islamistas radicals que, en nombre d'a sharia, han cometiu crimens contra personas y monumentos

Soldaus tuaregs d’Azawad. Foto: Magharebia

O Movimiento Nacional de Liberacion d’Azawad (MNLA) ha desencadenau una ofensiva militar contra as milicias islamistas, que controlan una parte d’o territorio, con a fin de forachitar-las. En o prencipio de 2012, o MNLA proclamó a independencia d’Azawad, que dica alavez formaba parte d’o norte de Mali, pero o control efectivo d’o territorio no ha estau posible a causa d’a presencia de collas armadas relacionadas con l’islamismo radical. Ixas collas, que controlan sobre tot qualques villas grans, como Gao u Tombuctú, han cometiu atrocidatz contra a población y, en nombre d’a lei islamica, han estricallau bells monumentos amazighs consideraus patrimonio d’a Humanidat.

A presencia d’ixas collas islamistas, como Ansar A Din u Al Qaida d’o Magreb Islamico (AQMI), mete en periglo a estabilidat y l’esvenidero d’Azawad como país independient y ha provocau dubdas sobre a capacidat d’o MNLA de controlar efectivament o país. Dillá, a comunidat internacional fa movimientos por fer una intervención militar que faiga fuera a las milicias islamistas y, previsiblement, torne o control d’a zona a o gubierno de Mali a traviés d’una negociación politica baixo l’apadrinamiento de Francia.

Ye por ixo que o MNLA preba d’obtener o control de tot o territorio d’Azawad antes d’a intervención internacional. A operación militar empecipió o 13 de noviembre pasau en as bases que o MNLA empara sobre a zona d’a muga con Nicher y, actualment, as tropas amazighs preban de mantener a iniciativa militar contra o que denominan o “terrorismo islamista”. En ixe sentiu, as fuerzas amazighs abanzarían enta Gao.

En paralelo a la ofensiva, bellas collas islamistas amoderarían a suya politica. Ye o caso d’Ansar A Din, que habría proposau d’establir contactos con o MNLA y que acceptaría de suspender l’aplicación unilateral d’a sharia. Ixa ufierta de dialogo ha estau bienplegada por o gubierno de Mali, con siede en Bamako, o que podría implicar negociacions multilaterals que metesen en risque a independencia d’Azawad.

Fuent: http://www.jornalet.com/nova/1061/azawad-lmnla-a-comencat-una-ofensiva-militara-contra-los-grops-islamistas

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.