Baixa l’ature en Aragón un 1,67% en mayo

Baixa l'ature en totz os sectors, manimenos, puya a temporalidat. Os gubiernos aragonés y espanyol s'amuestran asperanzaus

inaemAs cifras d’ature en Aragón, seguntes l’INAEM, se quedan en mayo en 114.763 personas, 1.950 (-1,67%) menos que no en abril. L’ature ha baixau amás en os quatro sectors de producción (agricultura -16,76%, 1.025 personas aturadas menos; construcción -3,08% y -491 personas; servicios -0,56  y -397 personas y industria -0,39 y -62 personas). Ista baixada, mas que mas en agricultura tien a viyer con o prencipio d’a campanya agricola y o prencipie d’a campanya de verano.

En as tres provincias, baixó l’ature en todas. En Uesca un -3,66% y 595 personas menos, Teruel un – 1,85% y 211 personas menos, y Zaragoza un -1,28% y 1.144 personas aturadas menos.

O numero de contractos realizaus en Aragón en mayo ye de 39.084, aumentando-se un 38,34% pero menos que no en mayo de l’anyo pasau. Os hombres han feito un 58,17% d’o total d’os contractos, y a francha d’edat entre 25 y 44 anyos ha acaparau o 63,37% d’o total de contractos. Os contractos indefinius han aumentau un 3,34% pero luen d’as cifras de mayo de 2012. O total de contractos indefinius feitos ye nomás d’un 7,51% d’o total. A temporalidat ha aumentau un 42,27%.

En o conchunto de l’Estau, a cifra d’aturaus y aturadas se situó en 98.265 personas menos, o millor dato d’a serie empecipiada en 1996 y o tercer mes consecutivo que baixa. A cifra total se sitúa en 4.890.298 personas sin treballo, seguntes o SEPE.

Tanto o Gubierno aragonés como o Gubierno espanyol consideran as cifras de “asperanzadoras”. Francisco Bono, consellero d’Economía y Emplego d’o Gubierno d’Aragón ha indicau que “puede marcar-se o prencipio d’una tendencia” resaltando que “en o conchunto de l’anyo puede haber-ne una reducción“.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.