Baixa lo presupuesto t’as Fiestas d’o Pilar de Zaragoza

Cartel Pilars 2011

Cartel Pilars 2011

O concello de Zaragoza ha feito publica parti d’a programación d’as fiestas. A tamás de mantener o numer de actos, o presupuesto total se rebaixa un 37%.

 Jerónimo Blasco ha enantau parti d’a programación d’as fiestas d’o Pilar y as suyas cuentas. O presupuesto total plegará en os 1.450.000 euros, d’os quals 750.000 serán alportaus por o Concello zaragozano. Bi habrá más de 800 actos de toda mena en 32 scenarios diferents, adhibindo-se-ie a Plaza d’o Chusticia por primer anyada.

 Os conciertos de baldes se ferán totz en a Plaza d’o Pilar, en estar lo Paseyo d’a Independencia en obras. O siete d’octobre ferán a debantadera Despistaos, Jarabe de Palo y Nadaquedecir. Prenerán o relevo Zaragoza 40 Pilipop, Almas mudas y Melendi o diya ueito. O nueu será o turno de Guevara y Rosario Flores. O diez bi serán Las Grecas, Aldeskuido, Kiko, Shara, Plaza Sur, Fernando Soto, Natalia y Maka, El Maki y La Húngara. A vispra d’o Pilar será a Fiesta Máxima Independance qui meta a mosica en a Plaza. O segundo cabo de semana bi pasarán Danie Zueras, Seguridad Social y OBK, o diya catorce y Revolver y Taxi, o quince. Fangoria y Daniel Zueras, qui cantará a suya versión de Somos, de Labordeta, serán os encargaus de rematar o cartel de actuacions en a Plaza.

Os fuegos artificals que sinyalan a fin a las fiestas, se ferán antis que de cutio, a las 22.30. O cambio de hora responde a que “ye un acto familiar y hebanos recibiu soxerencias” de que a meyanueit yera masiau tarde. Cambea tamién, por as obras d’o Tranvía, o recorriu de bells actos. O desfile d’o Pregón, prencipiará en a marguin cucha, en o Parque d’Orient, pasando por o Puent de Piedra dica plegar en a Plaza d’o Pilar. A Ufierta de flors prencipiará en a Plaza Sant Miguel t’as collas y en San Vicent de Paul t’a qui bi vaiga de traza individual. As casas rechionals ferán tamién
casamuda, pasando a meter-se en o vico de Valdespartera.

Os scenarios continarán estando los mesmos, tornando a fer-se servir a Plaza d’o Chusticia, que acubillará l’actuación de collas de pop-rock aragonés y un festival indie-pop os diyas 12, 13 y 14. En a Plaza Sant Bruno se podrán sentir collas de ixotas y de mosica folk de toda mena.

Os traches tradicionals aragoneses serán ista anyada más protagonistas. O diya ueito a Sala Multiusos, a on que se será fendo o 125 Certamen Oficial de Ixota Aragonesa, se celebrará a pasarela de Indumentaria Aragonesa. O diya 12 se ferá tamién o I Concurso de Trache Tradicional Aragonés, premiando un churau a ropa más achustada a lo vestir tradicional. Ixe mesmo diya, un gran concierto de campanas dirichiu por Llorenç Barber ferá sonar arredol de 100 instrumentos dende 14 torres de ilesias d’o centro d’a ciudat.

2 Rispuestas a Baixa lo presupuesto t’as Fiestas d’o Pilar de Zaragoza

  1. Belun sape si podremos sentir iste anyo a la ronda de boltanya en a plaza san bruno? y si no, siempre tendremos a movideta madalenera !!

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.