Bárcenas, o dirichent d’o PP millor pagau quan ya no yera en o partiu

Seguntes El Mundo, a suya nomina estió a mas altera d'o PP en 2010 y 2011. Rajoy heba dito que l'alavez extresorero ya no formaba parte d'o partiu

Protesta en a siede d'o PP de Madrit. Foto: Popicinio (http://www.flickr.com/people/69926959@N05) (CC-BY-SA)

Protesta en a siede d’o PP de Madrit. Foto: Popicinio (CC-BY-SA)

Continan as revelacions d’o caso Bárcenas a o diario El Mundo. Si ahiere publicaba una nomina pagada por o PP quan iste ya gubernaba, contradicindo as declaracions de Mariano Rajoy, hue o rotativo de Pedro J. Ramírez publica un grafico con as retribucions de qualques miembros d’o partiu entre 2006 y 2011. Afirma que o extresorero, Luis Bárcenas, estió siempre un d’os dirichents millor pagaus d’o partiu, y mesmo plegó a cobrar mas que no Rajoy en bells exercicios.

Seguntes El Mundo, estió en 2010 y 2011, en que ya no formaba parte d’o partiu seguntes heba asegurau Rajoy, quan o extresorero se convirtió por primer vegada en a persona millor pagada d’o PP, con un sueldo de 219.000 y 251.000 euros respectivament.

O pasau 1 d’agosto, o president espanyol aseguró en sesión extraordinaria en o senau que quan plegó en o gubierno, en noviembre de 2011, Bárcenas ya no formaba parte d’o PP. As nominas publicadas por El Mundo contradicen, manimenos, a Mariano Rajoy.

Bárcenas ye en prisión incondicional dende o pasau 27 de chunyo, quan o chuez d’o caso Gürtel consideró que  i heba risque de fuga y destrucción de prebas y, por tanto, que no le fixaría garra fianza.

Chustament maitín declararán a o chuez como testigos Francisco Álvarez Cascos, que estió secretaire cheneral d’o PP de 1989 a 1999, y Javier  Arenas, que tenió o mesmo cargo entre 1999 y 2003. O mierques lo ferá l’actual secretaire cheneral, María Dolores de Cospedal, a qui Bárcenas acusa d’haber recibiu una comisión ilegal de 200.000 euros pa lo PP de Castiella-La Mancha.

Fuent: http://www.vilaweb.cat/noticia/4138538/20130812/barcenas-dirigent-pp-ben-pagat-quan-era-partit.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.