Batasuna s’autodisuelve dimpués d’once anyos

Dimpués d'once anyos d'existencia, Batasuna se disuelve en considerar que ha rematau un ciclo politico en Euskal Herria

batasuna

A exdirichent de Batasuna Aurore Martin. Foto: Ezkerabertzalea.info

A colla politica vasca Batasuna ha decidiu d’autodisolver-se, como fin d’un ciclo politico, ta adaptar-se a la nueva situación existent en o conchunto d’Euskal Herria. Asinas l’expresoron ahiere en Bayona os suyos portavoces, Maite Goienetxe y Jean-Claude Agerre. Batasuna estió ilegalizada en Espanya en virtut d’a Lei de Partius Politicos en 2003, pero en Francia encara yera legal, a tamás de bellas detencions, como a recient d’Aurore Martin, ordenadas por Espanya.

Os portavoces han declarau que “nos veyemos obligaus a reconoixer que a fase politica en a que surtió Batasuna ye superada. Ya que ixa fase ye zarrada, tamién hemos de dar por acotolau o tiempo de Batasuna“, afirmando que “o mas important ye guaranciar a eficacia d’a nuestra luita y asegurar que os instrumentos politicos que amenistamos son adaptaus a o nuevo tiempo politico“. Un nuevo tiempo politico en a cucha abertzale que prencipió dimpués d’un debat interno que remató en a resolución “Zutik Euskal Herria“, desembocando en a conferencia d’Aiete y a fin d’a luita armada d’ETA.

A decisión de Batasuna viene dimpués d’atras disolucions d’organizacions abertzales como Segi u Askatasuna. Mientres, os militants de Batasuna decidirán qué instrumento politico consideran mas adequau, en referencia a una posible integración en o nuevo partiu politico d’a cucha abertzale, Sortu.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.