Belloch conchelará l’IBI y prencipiará o prochecto d’a segunda linia de tramvía antis d’o cabo d’a lechislatura

L'alcalde de Zaragoza ha feito un balanz d'a metat d'a lechislatura y "una apuesta de futuro definida por o gasto social"

Foto: Concello de ZaragozaL’alcalde de Zaragoza, fació ahiere un balanz d’as dos primers anyadas de l’actual corporación municipal, y presentó o decalogo con as actuacions que o gubierno d’a ciudat ferá dica la fin d’a lechislatura, entre as que i son a conchelación de l’IBI y o prencipio d’o prochecto d’a linia Este- Ueste d’o tramvía.

Belloch prencipió a suya charradas debant d’os meyos de comunicación fendo un repaso de l’actual situación social, politica y institucional en que ye o país, y que en o caso d’os concellos ye más grieu por as conseqüencias que, a curto plazo, tendrá a futura Lei de Sostenibilidat y Modernización de l’Administración Local, actualment tramitando-se, que suposará un notable achique de competencias y recursos t’os concellos.

L’alcade ha meso de manifiesto que as coportacions locals no son o problema porque, tot de conchunta, han feito un poder ta contener o gasto y achiquir o suyo deficit, tot isto – ha dito -, en o marco d’a estabilidat politica que s’ha conseguiu que bi hese en istas dos anyadas, gracias a l’aduya d’as collas municipals de Izquierda Unida y Chunta aragonesista en os afers alazetals t’a gubernabilidat d’a ciudat.

Contino, Belloch resumió as principals actuacions que s’han feito en as dos primers anyadas d’a lechislatura como conseqüencias de l’aplicación d’o programa de gubierno municipal, y que basicament ha pendiu en “a puyada d’o gasto social, o mantenimiento de l’emplego publico y d’a calidat d’os servicios publicos municipals, asinas como a contención d’o gasto y a estabilidat presupuestaria”.

En o más concreto, l’alcalde ha detallau os principals aspectos de lo feito dica agora, destacando, entre atros afers, a puyada d’o gasto social y l’encete d’os programas especials d’aduya d’urchent necesidat en tiempos de crisi como los actuals; o programa de meyación hipotecaria t’os afectaus por os impagos en demba de vivienda. En iste terreno, Belloch sinyaló que “somos conscients de que o nuestro papel en o creiximiento de l’actividat economica u en a creyación d’emplego ye modesto“, pero a tamás d’ixo “podemos tener un papel quasi decisivo en que a situación siga socialment tolerable, punto en o que o gasto social ye protagonista”.

O primer edil s’ha referiu tamién a los trangos entabant en o desembolique de Arcosur, Parque Venecia y Puerto Venecia, o Centro de Arte y Tecnolochía (eTopia) y d’o Teatro d’as Cantonadas, y d’o gran exito que ha teniu a dentrada en servicio d’a linia 1 d’o tramvía (Val d’Espartera – Parque Goya) de traza completa.

A l’arreu, l’alcalde ha recontau o decalogo d’as principals actuacions que o Gubierno municipal meterá en marcha en as dos anyadas que restan de lechislatura, “a tamás d’a dificil situación economica d’o país y d’a crisi institucional chenerada”.

As propuestas d’actuación que ha planteyau son:

1.- A rehabilitación de viviendas, o loguero y a ecoeficiencia como linias basicas d’as inversions municipals, siempre dende l’anvista d’a colaboración publico – privada.

2.- Aplicar as nuevas tecnolochías d’a comunicación ta lograr a sostenibilidat y o cabidar en os servicios publicos municipals, incluyida a chestión de l’augua.

3.- Enantar en que s’implante a tarcheta ciudadana, l’administración electronica y as nuevas aplicacions telematicas en a chestión municipal, t’ixamplar a eficiencia, l’accesibilidat y a transparencia municipal.

4.- Refirme a los emprendedors amprando-les l’emplego d’infraestructuras y servicios, entre ells, antimás de Zaragoza Activa (que ya ye funcionando a tot estrús), d’as instalacions de eTopía y d’a Torre Delicias.

5.- Implantar modelos de participación innovadera, tanto t’os colectivos ciudadans como a titol individual, t’amillorar a gubernanza d’a ciudat y embrecar-ie dreitament a los ciudadans.

6.- Rematar o Plan de viabilidat d’a segunda linia de tramvía (Este -Ueste) y, si ye posible, adchudicar o prochecto y as obras antis que no remate a lechislatura.

7.- No puyar l’IBI a garra ciudadan de Zaragoza en as venients dos anyadas, lo que significa que, en terminos reals, baixa a presión fiscal y os impuestos.

8.- Potencia o Casco Historico como atractivo d’o turismo de compras, cultural y relichioso, empentendo una ordenanza de propio ta ista demba que bi incluiga bonificacions de l’IBI t’os comerciants d’ista redolada.

9.- Fer funcionar una mesa de treballo social y profesionalizada t’analisar a incidencia d’a falta de refirme d’os gubiernos espanyol y aragonés t’a politica de construcción de viviendas de VPO, y a suya incidencia en o Plan Cheneral d’Ordenación Urbana de Zaragoza. Antimás, deixar a la disposición d’os emprendedors suelo industrial y productivo, agora sin emplego, con procedimientos de baixo coste u pago prolargau.

10.- Negociar con o Gubierno d’Aragón un gran alcuerdo institucional sobre l’aplicación en o futuro d’a nueva lei de Sostenibilidat y Eficiencia de l’Administración Local (que modifica la lei de Bases de REchimen Local), con dos premisas fundamentals: que no se pierdan competencias ni servicios que actualment se dan a los ciudadans y que no se pierda emplego publico.

 

 

 

Fuent: http://www.cronicadearagon.es/wordpress/?p=41818

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.