Berlusconi, condenau a siet anyos de prisión por o caso Ruby de prostitución

O fiscal n'heba demandau seis

berlusconiL’exprimer ministro italiano Silvio Berlusconi ha estau condenau a siet anyos de prisión y a la inhabilitación de por vida ta exercer garra cargo publico por o caso Ruby de prostitución. S’ha conoixiu o veredicto ista mesma tarde. Berlusconi, de 76 anyos, yera acusau d‘abuso de poder y de mantener relacions sexuals a cambeo de diners con una menor.

Dimpués de dos anyos y tres meses de proceso y dimpués d’una cinquentena d’audiencias, os chueces de Milán han preso hue ista decisión. O fiscal heba pediu seis anyos de prisión y inhabilitación ta exercer garra cargo publico entre toda a vida. Por tanto, os chueces, que consideran prebada a ‘prostitución sistematica’ promovida por Berlusconi en as fiestas anomenadas ‘Bunga bunga’, han sentenciau con una condena encara mas alta que no pediba o fiscal. D’iste modo, os chueces tamién consideran prebadas as relacions a cambeo de diners que Berlusconi mantenió con Karima o-Mahroug, conoixida con o nombre de Ruby, quan ista encara teneba 17 anyos, y que mas ta debant fació servir a suya influencia ta liberar-la d’una comisaría.

Por agora no entrará en prisión

L’advogau de l’exprimer ministro, Niccolo Ghedini, ha anunciau que Berlusconi recurrirá a sentencia y por ixo ye encara dificil que Berlusconi vaiga a la prisión. As alegacions que pueda presentar Berlusconi pueden retrasar o proceso y retardar-lo asinas encara bell anyo.

Mientres s’asperaba a sentencia, un grupo de mullers han cantau a canta ‘Bella Ciao’ a las puertas d’os chudgaus (vidio de La Repubblica). A decisión chudicial ha estau recibida con aplausos y chilos de goyo.

Fuent: http://www.vilaweb.cat/noticia/4128699/20130624/berlusconi-condemnat-set-anys-preso-cas-ruby-prostitucio.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.