Berlusconi deixa o gubierno mientres Napolitano decide o sucesor

O chefe d'estau italiano piensa encara si nombrar a Monti u convocar eleccions

13 noviembre, 2011 | Mundo | Autor: Arredol | Tweet

Berlusconi en a tuca d'o G-8

O chefe de l’Estau italián, Giorgio Napolitano, prencipia  las consultas con os representants politicos d’o país, dimpués d’as quals decidirá si convoca eleccions anticipadas u a formación d’un Gubierno de transición, dimpués d’a dimisión ahiere d’o primer ministro Silvio Berlusconi.

Como s’heba anunciau, Berlusconi presentó a renuncia a Napolitano dimpués que a Camera d’os Deputaus aprebase de forma definitiva a Lei de Presupuestos ta 2012, que conteneba las reformas economicas dexichidas por a Unión Europea.

La marcha de Berlusconi estió acullida con goyo por muitos italians en Roma (veyer video), que salioron a las carreras d’a capital ta fer borina por a marcha de qui ha marcau a politica italiana mientres que os zaguers 20 anyos.

Tot pareixe indicar que ta apanyar ista crisi de Gubierno, ubierta dimpués d’a dimisión de Berlusconi, finalment se trigará a formación d’un Gubierno tecnico con l’economista y excomisario europeu Mario Monti, de 68 anyos, a o frent.

Monti estió designau senador vitalicio o pasau miercols por o chefe de l’Estau italián, en o que ha estau interpretau como un refirme a la suya candidatura que tien atros actors intresaus como o president francés y a canciller alemana.

L’economista conta amás con un amplio emparo entre as fuerzas parlamentarias italianas y mesmo o partiu de Berlusconi ha amostrau a suya intinción de refirmar-lo.

Mario Monti estió asesor d’o banco Goldman Sachs y bellas informacions aseguraban que o banco fació un informe dimpués de conoixer que Berlusconi marchaba an que pronosticaba que si se feban eleccions a prima de risque continaria puyando, mientres que si se nombraba un sucesor tecnico, como Monti, a prima de risque italiana prencipiaria a baixar.