Bezeit celebra una chornada en esfensa d’a luenga catalana endrezada t’a catrinalla

Muitas familias son preocupadas por a perda d'a transmisión cheneracional d'a luenga catalana en o Matarranya

cartelIste chueves 21 se ferá en Bezeit (Matarranya) a II Alifara t’a catrinalla que organiza cada anyo Clarió, una asociación de mais y pais d’o Matarranya adedicada a la promoción y conservación d’a luenga catalana entre os más chiquetz como luenga materna.

Con o titol “Aimamos a nuestra luenga“, s’ha organizau una fiesta con toda mena d’actividatz. De maitins se ferá una cursa t’o río ta conoixer os animaletz que i viven y viyer baixo a lupa como ye conservau o río Matarranya. Contino, os participants podrán colaborar creyando una escultura colectiva con cantals d’o río que representará o cangrillo autoctono, una especie protechida muito valurada

De tardes, dimpués d’a chenta y d’una asambleya ta socios, tornarán os actos ta totz con una brenda popular y l’actuación d’o mago Zapata. Mientres tot lo diya bi habrá tamién un puesto con libros en catalán en a plaza d’o lugar. Todas as actividatz son de baldes y contan con l’aduya d’o concello y a comarca y d’a Caixa Rural de Teruel.

L’asociación Clarió recorda que naixió fa tres anyadas de man de qualques familias d’a comarca “preocupadas por a important perda d’a luenga materna entre os ninos“. Antimás ista asociación reivindica “la responsabilidat d’os gubiernos en guarenciar que se conserve a luenga”. “Agora mesmo, os escolars de primaria nomás tienen una hora a la semana d’a suya luenga materna, y como asignatura optativa, lo que no ye prou ta guarenciar o conoiximiento oral y escrito d’a suya propia luenga”, adhiben.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.