Breivik, condenau a vintiún anyos de prisión prorrogables

O churau ha publicau huei a sentencia por as matanzas d'Oslo y d'Utøya

O churau d’o caso d’a matanza d’Utøya y de l’atentau d’Oslo, cometius por Anders Breivik fa poco mas d’un anyo, l’ha condenau a la pena maxima, vintiún anyos de prisión, con a posibilidat de prorrogar-los. O churau l’acusa de traza unanime de ‘actos de terrorismo’ y l’ha declarau, amás, mentalment sano. Asinas, pues, no complirá a pena en un psiquiatrico, soque en una prisión.

Breivik fació esclatar un autobomba en o centro d’Oslo, que mató a ueito personas y firió a mas de docientas. Dimpués fue ta l’islote d’Utøya, a on as choventutz d’o partiu laborista noruego feban una acampada y, vestiu de policía, en mató a sixanta y nueu a disparos.

Os atentaus, os piors de Noruega dende a Segunda Guerra Mundial, trestucoron o país.

Breivik, de trenta y dos anyos, antigo militant d’o Partiu d’o Progreso (FRP), d’extrema dreita, consideraba a os chovens que participaban en o campamento de verano en Utøya ‘traidors a favor d’a immigración’.

En o chuicio que s’heba feito istos zaguers meses, heba confesau estar l’autor d’ixa matanza; dició que lamentaba ‘no haber iu mas allá’ y que actuó ‘porque caleba’. Breivik no reconoixió l’autoridat d’o tribunal que l’heba chudgau.

O churau heba de’alazetar o veredicto en o feito de si Breivik teneba bell trestorno mental quan fació os ataques, y d’isto dependeba que ingresara en a prisión u en un centro psiquiatrico. A sentencia de hue lo declara mentalment sano y, por tanto, habrá d’ingresar en una prisión.

Un informe independient diz que a policía podeba haber empachau os ataques de Breivik.

A comisión d’investigación d’os ataques en a capital noruega, Oslo, fa pocas semanas criticó durament en un informe o papel d’a policía. En concreto, se considera que l’atentau con bomba en o centro d’a ciudat se podría haber evitau y que l’autor, Anders Behring Breivik, podría haber estau arrestau antes. ‘L’ataque contra o vico ministerial d’o 22 de chulio se podría haber evitau gracias a l’aplicación eficaz d’as midas de seguranza existents’, concluye a comisión en l’informe ninviau a o primer ministro noruego, Jens Stoltenberg, que ha admitiu a tardanza.

L’informe tamién critica que a policía arribó en a isla d’Utoya setanta menutos dimpués de recibir un primer aviso.

Cinco diyas dimpués d’o doble atentau, os partius noruegos alcordoron creyar una comisión d’evaluación independient, a clamada Comisión 22 de Chulio, que ha publicau o primer informe en paralelo con o proceso contra Breivik, o chuicio que quedó visto ta sentencia o 22 de chunio.

Fuent: http://www.vilaweb.cat/noticia/4035739/20120824/breivik-condemnat-vint-anys-preso-prorrogables.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.