Bruselas demanda a Espanya tornar a puyar l’IVA y atrasar a chubilación

Se fa publico l'informe de cumplimiento d'as condicions d'o rescate bancario

europaA Comisión Europea torna a aumentar a presión sobre l’estau espanyol exichindo-le nuevas midas d’austeridat. En concreto, ha demandau en l’estau que torne a puyar l’IVA y os impuestos meyoambientals ta reducir o deficit y que accentúe encara mas a reforma laboral y as pensions, atrasando una vegada mas a edat efectiva de chubilación.

Bruselas demanda, amás, que o gubierno espanyol aplique de traza mas estricta a lei d’estabilidat presupuestaria a las comunidatz autonomas que incumplen os suyos obchectivos de deficit y que accelere l’encete d’a oficina de control presupuestario.

Istas recomendacions amaneixen en o segundo informe d’evaluación d’o rescate bancario ta Espanya elaborau por l’executivo comunitario, en colaboración con o Banco Central Europeu (BCE). L’informe replega as conclusions d’os inspectors que viachoron ta Madrit d’o 28 de chinero a l’1 de febrero.

Bruselas arguye que a puyada de l’IVA que s’aplica dende o setiembre pasau (d’o 18% a o 21% por o tipo cheneral y d’o 8% a o 10% por o tipo reduciu) ye un progreso ta amillorar a eficacia d’o sistema fiscal espanyol. ‘Con tot y con ixo, encara i hai marguin ta amugar l’aplicación de diferents tipos d’IVA reduciu y ta aumentar os impuestos meyoambientals, especialment os d’os carburants’, diz l’informe.

En materia presupuestaria, a Comisión demanda reforzar l’aplicación d’a lei d’estabilidat presupuestaria. ‘L’aplicación d’as disposicions d’a lei por o que fa a os mecanismos correctivos y d’alerta temprana podría fer-se mas eficaz y transparent’, suchiere.

L’informe critica que os plans d’o gubierno espanyol ta fer una oficina presupuestaria independient, exichida por a UE, encara son en una fase de paranza. ‘S’habrán d’accelerar considerablement si se quiere que a oficina chugue un papel eficaz y immediato ta l’exercicio presupuestario 2014’, reclama Bruselas.

Y contina l’informe: ‘O deficit recurrent en o sistema de seguridat social tamién s’ha de controlar […] Os plans ta introducir un factor de sostenibilidad en o sistema de pensions y ta aumentar a edat efectiva de chubilación serían un trango important en ista dirección, pero encara s’han d’adoptar.’

A Comisión diz que a reforma laboral aprebada por o gubierno de Mariano Rajoy l’anyo pasau ‘podría estar empecipiando a tener un impacto, como puede alufrar-se en a moderación salarial y en l’aumento d’os despidos procedents’. ‘A reforma tien potencial ta fortalecer o vinclo entre chornals, o ciclo economico y a posición d’as interpresas‘, diz a Comisión.

Con tot y con ixo, Bruselas sinyala que ‘a dualidat en o mercau laboral persiste sin cambeos’ y diz que ‘a gravedat d’a situación d’o mercau laboral exiche una vichilancia y una revisión contina de l’impacto d’a reforma.’ As autoridatz espanyolas s’han comprometiu a fer una revisión mientres o primer trimestre de l’anyo y a Comisión demanda centrar-se en ‘l’impacto en a dinamica salarial, a segmentación d’o mercau laboral y a ocupabilitat.’

Amás, l’executivo comunitario demanda en o gubierno espanyol aumentar o gasto en formación, a integración en o mercau laboral y a reorientación profesional, amás de modernizar os servicios publicos de treballo y amillorar a coordinación entre os nacionals y autonomicos.

Bruselas lamenta que encara no s’haiga aprebau a lei de liberalización de servicios profesionals y demanda que o grau d’anglucia d’a lei de mercau unico ‘no se reduzca mientres o proceso lechislativo.’

Risques macroeconomicos d’o deficit de tarifa

A Comisión Europea avisa que o deficit de tarifa ‘suposa un pasivo continchent considerable t’o presupuesto, asinas como risques macroeconomicos no despreciables.’ En 2012, plegó en 5.000 millons (o 0,5% d’o PIB), superando por un amplo marguin o ran previsto de 1.500 millons.

‘O total acumulau d’o deficit de tarifa supera os 29.000 millons’, diz l’informe, que adhibe que a tamás d’as midas ya aprebadas por o gubierno espanyol, en 2013 tornará a plegar en un ran considerable.

Fuent: http://www.vilaweb.cat/noticia/4091426/20130305/brusselles-demana-espanya-tornar-apujar-liva-endarrerir-jubilacio.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.