Bruselas investigará a chestión d’o Gubierno d’Aragón sobre os espacios Ret Natura 2000

A eurodiputada d'IU Marina Albiol denunció en o Parlamento Europeu a chestión d'o Gubierno aragonés en ista materia

Val d'Ordesa. Foto: Jsanchezes (CC-BY-SA 3.0)

Val d’Ordesa. Foto: Jsanchezes (CC-BY-SA 3.0)

A Comisión Europea investigará a chestión d’o Gubierno d’Aragón en relación a la declaración de Zonas Especials de Conservación y a o establimiento d’as midas de conservación d’a biodiversidat conforme a la Directiva d’habitats, dimpués d’a denuncia presentada por a eurodiputada d’Izquierda Unida, Marina Albiol, a solicitut d’IU Aragón. Amás, a CE entiende que, dimpués de consultar a información sobre a chestión d’o Gubierno aragonés en materia de protección d’a Biodiversidat, no s’ha compliu con as Directivas europeas de traza suficient en Aragón en os espacios consideraus y anuncia que adoptará as midas necesarias a o suyo debiu tiempo.

O chinero pasau, o grupo parlamentario IU Aragón se dirichió a o suyo grupo en Bruselas debant d’a suya preocupación por “mala” chestión d’o Gubierno d’Aragón en materia de protección d’a Biodiversidat, en concreto, por os tramites realizaus por a DChA sobre os espacios d’o Ret Natura 2000. Una denuncia manifestada tamién por asociacions medioambientals como a Fundación t’a Conservación d’o Cluixiuesos.

Cal recordar que a Directiva d’habitats en o suyo articlo 6 estableix que “respective a las zonas especials de conservación, os Estaus miembros fixarán as midas de conservación necesarias que embrecarán, en o suyo caso, adequaus plans de chestión, especificos a os puestos u integraus en atros plans de desenrollo, y as apropiadas midas reglamentarias, administrativas u contractuals que respondan a las exichencias ecolochicas”. En o Estau espanyol ista competencia la tienen asumida os gubiernos territorials.

Asinas Marina Albiol, y seguntes as Directivas citadas, advirtió en a suya pregunta a la CE que os espacios LIC y ZEPA que forman parte d’o Ret Natura 2000 han de tener aprebaus plans de chestión con midas especificas t’a suya conservación. En o caso d’Aragón, “amán de 50 ZEPA y mas de 120 LIC amenistan d’istos plans que habrían d’haber estau adoptaus antes de finals de 2011”, sinyaló a eurodiputada d’IU ta detallar que entre istos enclaus se troban espacios tant significativos como a ZEPA d’os Congostos d’o río Xalón, u os LIC d’Ordesa y Mont Perdiu, y os de Sierra y Canyons de Guara.

Por a suya parte, o diputau d’IU por l’Alto Aragón y portavoz de Medio Ambient, Miguel Aso, recorda que o suyo grupo pidió a reprobación d’a chestión d’o Gubierno d’Aragón por ista qüestión. “Denunciamos debant d’as Cortes o retardo existent en l’aprebación d’os plans de chestión d’os espacios d’o Ret Natura 2000, por a insuficient aportación economica t’a millora y protección d’a nuestra flora y fauna, asinas como por l’ausencia d’abances en a confección y inicio de plans de millora d’as especies protechidas d’Aragón”, apunta Aso.

“O Gubierno de Rudi sabe que va con muito retardo, en primer puesto porque o Gubierno PSOE-PAR no fació a suya parte y en segundo puesto, porque t’o Gubierno d’Aragón, a conservación d’a biodiversidat no ha estau una prioridat ni en a chestión ni en o presupuesto”, diz Aso que “fue o pasau 13 de chinero de 2015 quan publicó en o BOA a obridura d’o periodo d’información publica d’o prochecto de Decreto por o qual se designan as Zonas d’Especial Conservación d’a biorrechión alpina d’Aragón y s’apreban os plans de chestión d’os espacios d’o Ret Natura 2000, quedando encara por prencipiar os d’a biorrechión mediterrania, que en son a mayoría”.

Finalment Aso ha sinyalau que “a conservación d’a biodiversidat, dillá d’estar una obligación legal y moral, ye una oportunidat important de desenrollo endocheno sostenible, que no podemos perder y que hemos de meter en valor”.

A situación motivó as preguntas d’Albiol a la CE, en as que reclamó que informase d’o grau de conoixencia d’iste incumplimiento por parte d’as autoridatz aragonesas, d’as midas que ha preso u piensa prener ta que presienten con caracter d’urchencia totz os plans de chestión y explanicase si s’ha dirichiu u piensa dirichir-se a las autoridatz competents ta conoixer mas en detall o estau de conservación d’istos espacios dimpués d’anyos sin aplicar-ie midas especials de protección.

Fuent: http://arainfo.org/2015/04/bruselas-investigara-la-gestion-del-gobierno-de-aragon-sobre-los-espacios-red-natura-2000/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.