Buena participación en a vada cheneral en Teruel

Buen seguimiento d'a vada en Teruel con amán de 5.000 personas en os dos bloques d'a manifestación y ocupacions de supermercaus y bancos

Foto: AraInfo Teruel

En as carreras de Teruel a chornada de vada cheneral prencipiaba de maitinada con un talle de carretera en a carretera d’acceso a o poligono. A las 7.30 saliban os piquetes d’o Bloque Critico por as carreras d’o centro, pasando por centros educativos y atros centro de treballo dica as 9.00 d’o maitín, a on se’n fue a por os grans supermercaus. A las 9.30 horas d’o maitín o Mercadona d’a Plaza Mansuetos chitaba a persiana. Poco dimpués prencipiaba o piquete unitario en o Campus Universitario que vuedó as 2 aulas a on i heba belún. A las 11.30 partió a manifestación seguida por unas 300 personas y convocada por l’Asamblea d’Estudiants, que recorrió as carreras de Sant Lión y o Centro. O momento mas emotivo d’o maitín estió quan a manifestación aturó debant d’a puerta d’a Residencia de Mayors Turia, menazada de zarre por a DGA y a on treballadors y usuarios se concentran totz os diyas ta refusar o zarre. Dica con glarimas en os uellos estudiants, ancianos y treballadors s’aplaudioron mutuament a o chilo de “Sí se puede”. En iste vidio podemos veyer a scena.

Dimpués d’a lectura d’os manifiestos de l’Asamblea d’Estudiants de Teruel y de l’Asamblea de Marea Verda se desconvocó a manifestación y prencipió o Piquete Central d’o Bloque Critico, ent’as 13.00 horas practicament todas as entidatz financieras d’o centro ya heban chitau a persiana y o maitín remató con una ocupación d’a sucursal d’o BBVA d’a Plaza d’a Seu. Video de TLT.

Ya de tardis y antis d’a manifestación continoron os piquetes que convencioron a quasi totz os comercios y tabiernas que quedaban ubiertos ta que chitasen a persiana y s’unisen a las movilizacions. A las 19.00 horas partiba con dificultat dende a plaza d’a Seu a manifestación con dos bloques bien diferenciaus: por un costau o Bloque Critico con unas 2500 personas y por unatro o bloque de CCOO/UGT con atras 2000 personas.

Entre que a comparsa oficial contino o suyo recorriu dica a plaza d’a Seu, o Bloque Critico finalizó a manifestación en a plaza d’o Torico a on con a plaza a rebutir, se recordoron os motivos d’a vada y a necesidat d’empecipiar a parar a partir d’o diya 15 nuevas movilizacions. Con a manifestación desconvocada se formó un nuevo piquete de 250 personas que ocupó o supermercau Lidl dica que os responsables decidioron zarrar y dimpués se fació lo propio con Mercadona, que corrió a mesma suerte.

Fuent: http://arainfo.org/2012/11/buena-participacion-en-la-vada-cheneral-en-teruel/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.