Bulbuent recupera y reviscola iste sabado a la suya “Mora Encantada”

Ista localidat recupera a suya mitica leyenda d'a Mora Encantada con una serie d'actividatz iste sabado 22

cartelmoraencantadaO venient sabado 22 de chunio, se celebrará en Bulbuent por primer vegada a recreyación d’a leyenda de “A Mora Encantada”. A recuperación d’ista leyenda ha estau posible gracias a la iniciativa de Joaquín Pradilla Bona, DJ y vecino d’a localidat.

Narra a leyenda que a filla d’un prencipe musulmán, sinyor d’o castiello de Bulbuent, s’enamoró d’un caballero cristiano. O pai d’a mesacha, de qui se deciba que teneba poders machicos, fació servir todas as suyas estucias ta trencar ixa relación, pero en no consiguir-lo decidió de convertir en piedra a la choven y condenó a o caballero a vagar toda a eternidat por o castiello de Bulbuent. O poder desplegau en o fechizo causó un gran fundimiento d’o terreno.

D’ista traza a leyenda explica a formación d’a simera conoixida como a “fuesa d’a mora encantada”, proxima a la localidat, y en a quala puede veyer-se-ie una gran losa de piedra que muitos identifican con a choven fechizada.

A leyenda fa honra de marco ta una chornada plepiada d’actos. De maitins se podrá contemplar una exposición d’armas medievals y conoixer cómo yera una capiella medieval gracias a la reconstrucción que ha feito a colla Feudorum Domini ta la ocasión, contino o visitant podrá alufrar cómo se vestiba a un caballero medieval.

De tardes se celebrará un taller de caligrafía medieval ta ninos y adultos, qui dimpués podrán disfrutar d’un cuentacuentos y aprender cómo se vestiba a una dama d’a epoca.

Finalment, a representación d’a leyenda de “A Mora Encantada” a los pietz d’o castiello y baixo a luz d’a luna será o colofón d’una chornada intensa que naixe con esprito de continuidat y con a quala se pretende de reivindicar a importancia d’a conservación y recuperación d’a memoria popular.

Recuperación d’o castiello

Por o que fa a o Castiello, o concellero de Cultura de Bulbuent, José Manuel Andrés Abad, indica que “a Torre ye rematada y que se puede acceder t’a terraza por medio d’una escalera metalica, encara que l’edificio encara no ye ubierto a o publico”. Antiparti, “s’ha trobau un zocalo de piedra en a sala d’armas, y en a casa contiga s’ha trobau una nevera que de seguras perteneixió a o Castiello”. Os quefers de restauración continan ta debant con o Palacio.

Gracias a iste evento s’ha puesto recuperar tamién un postre tipico, a coca de Bulbuent, que se podrá adquirir en a botiga d’a localidat mientres toda a chornada. Tamién as tabiernas s’han quiesto sumar a ista iniciativa ufrindo tapas con uns nombres tant sucherents como “a mora encantada”, “a torre de Bulbón” u “o fechizo de Ben Abed”.

A celebración d’ista chornada ha estau posible gracias a l’intrés d’o Concello de Bulbuent por recuperar a historia y o patrimonio d’a localidat. Han colaborau en a organización de l’evento Endrezar, Patrimonio Cultural y a colla recreyacionista Feudorum Domini.

Fuent: http://www.cronicadearagon.es/wordpress/?p=42065

Una rispuesta a Bulbuent recupera y reviscola iste sabado a la suya “Mora Encantada”

  1. Pingback: Bulbuent recupera y reviscola iste sabado a la suya “Mora Encantada” | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.