Cabo de semana de tenis de mesa

Helios y CAI Santiago visitan a o líder Mataró y torna la liga en Primera femenina.

Os equipos de tenis de mesa CAI Santiago y o C.N. Helios s’enfrentan iste cabo de semana a o lider d’a División d’Honor de tenis de mesa, o C.N. Mataró-Quadis, que nomás ha perdiu una trobada en o que va de liga y ye un d’os candidatos plateros ta puyar a la categoría maxima.

O primer en dentrar en liza estará o CAI, que recibe a os barceloneses dende as 17.00 horas, en un duelo más que no complicau t’o quadro zaragozano, que alineará Jorge Cardona, Alberto Luño y o chóven Cristian López, qui sustituirá en ista ocasión a o lesionau Jorge Gambra.

Igualment complicau estará o reto ta Helios, que a más habrá de desplazar-se a tierras catalanas ta chugar o domingo de maitíns. A expedición azulona la formarán os habituals Marcelo Toledo, Alfonso Beamonte y Víctor Dobato.

En o Mataró ye baixa o suyo segundo chugador, o chovenil Xavi Peral, que se troba convocau con a selección nacional y que será sustituyiu por Cristóbal García, un autentico referent d’o tenis de mesa espanyol que plega de fichar por a colla catalana ta reforzar as suyas opcións d’ascenso. Chunto a él chugarán o suyo chirmán Manuel García -un d’os millors palistas d’a categoría-, y o chovenil Yordi Jason Ramos.

Sara Escota, Cristina Raducan y Alejandra Gimeno chugadoras d'o CAI Santiago. (Foto: Comunicación Tenis de Mesa)

Torna la liga en Primera femenina
En Primera División femenina, o School Zaragoza tien chornada de discanso, pero Helios y CAI Santiago tornan ya a la competición hibernal. O conchunto caísta, segundo clasificau d’a colla, viacha a la provincia de Girona ta enfrentar-se o sabado a o CTT Tramuntana-Figueras y o domingo a o CTT Báscara, que ocupan a tercena y quartena posición respectivament, con os mesmos puntos que as aragonesas.

Ta istas trobadas, o CAI Santiago formará con Sara Escota, Yara Grimal, Alejandra Gimeno y l’alevín Cristina Raducán, que debutará oficialment en liga ista temporada.
Por a suya parti, l’equipo femenino d’Helios, que ye debantzaguero, recibe o domingo al Suris Calella, rival que tamién cuenta con un unico triumfo y a o que, por tanto, as azulonas podrían superar en a tabla si consiguen a victoria. Chugarán as habituals Ainhoa Antúnez, Laura Ciriano y Estela Valer.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.