Cados Radio, fer radio en aragonés dende la escuela

A partir d’ista semana bellas noticias d’Arredol se podran sentir tal como las siente qui dende TEAFM ascuita o programa que i fan os escolanos d’Escolapios de Zaragoza. Semana zaga semana, José Gimeno y Alberto Jiménez, de 3er d’ESO, fan iste chicot informativo en aragonés dende as ondas. A ideya de fer radio en aragonés, mos reconta Paco Lagraba, un d’os mayestros, estió porque “bi ha alumnos y pais d’a nuestra escuela que han l’aragonés como luenga materna en casa suya. Pero no troban radios que emitan programas en aragonés con cuentos o noticias que lis ne intresen. Nusatros femos un chiquet servicio ta que los zagals sientan en aragonés a atrás presonas, a atros ninos que no solo sus pais“.

Paco, chunto con Victor Longares, son os mayestros d’ista escuela zaragozana, an que “totz los alumnos fan clase d’aragonés y en aragonés en lo tercer ciclo de primaria en clase como unidat didáctica curricular. Dimpués miramos de que sigan participando en la ESO, como en la misa que paran totz los años ta San Valero y lis animamos a que s’apunten a los cursos que se fan en la ciudat de Zaragoza“. Por ixo esplanica Lagraba que “ye fácil trobar-se con un antico alumno que charra aragonés y que ye triballando en Nogara o Fablans. Totz os maestros charran de l´aragonés en clase quan pertoca la diversidat lingüística, porque miramos de que conoixcan l’aragonés porque sólo lo que se conoixe se aima y se siente como propio“.

Dende Arredol, y agradeixius porque bellas d’as noticias que fan son d’iste chicot diario dichital, mos fa goyo espardir a suya fayena y por ixo, cada semana, en colaboración con TEA FM, pencharemos o suyo informativo ta que se pueda sentir dende ista web.

Ta sentir, nomás hetz de punchar en o play en o reproductor. Cada semana, amás, estará en o lateral d’Arredol.com o programa d’ixa semana y tamién os d’as anteriors.

2 Rispuestas a Cados Radio, fer radio en aragonés dende la escuela

  1. Istos zagals escolanos d’as Escuelas Pias son fendo una revolución en veras d’a luenga aragonesa. Dica agora, charrar l’aragonés en a escuela yera una enchaquia de vergonya y a chen l’amagaba asabelo. Istos valients son fotendo una liciòn d’argüello d’a nuestra luenga à todas cheneracions precedens de fablans

    Si plegaz à leyer iste mensache, zagals de TEA FM: Bravo por o vuestro treballo y rasmia; à no reblar. Y gracias à os vuestros mayestros y as Esculelas Pias, l’aragones ye una luenga tan chicorrona y acosada dende as instituciòns que ista gran aduya ye d’agradexer 🙂 Entaban mozets!!

  2. Ent’abant, mocetz! A plantar fuerte!

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.