Caja3 habrá de reestructurar-se de traza efectiva ta fusionar-se con Ibercaja

Dimpués de l'intento falliu d'unión con Liberbank, as dos companyías pareixen haber sinyau un alcuerdo defintivo. A intención ye creyar un gran banco aragonés con siede social en Zaragoza

Dimpués d’o falliu intento de fusión a tres bandas entre Ibercaja banco, Caja Inmaculada (Caja3) y Liberbank, os consellos d’Administración d’as dos primeras entidatz han confirmau que, finalment, encetarán un proceso de fusión t’a creyación d’un banco aragonés, siempre que Caja3 aconsiga reestructurar-se tal como le demanda Bruselas. A decisión ya s’ha comunicau a la CNMV y suposará a creyación d’un gran banco aragonés, practicament en os mesmos termins que s’anuncioron en o primer intento.

Tal como han confirmau dende Ibercaja, l’adquisición de Caja3 por parte d’a entidat d’Amado Franco será “supeditada a la obtención d’as autorizacions correspondients y a que Banco Grupo Caja3 obtenga l’aprebación d’o suyo plan de reestructuración, as aduyas de capital que calgan, y adopte as midas exichidas t’o suyo cumplimiento”, apuntan en un comunicau.

Dimpués d’a fusión, que tardará bells meses dica que Bruselas dé o visto bueno a la reestructuración d’os bancos d’o ‘Grupo 2’, o nombre d’a entidat resultant será ‘Ibercaja banco’, con domicilio social en Zaragoza. Respective a o reparto accionarial, Ibercaja adquiere o 100 % d’o Banco Caja 3 y iste, a cambeo, recibirá o 12,50% d’Ibercaja Banco, que ostentará o 87,5% d’o capital, apuntan fuents d’a entidat.

“Con ista adquisición, Ibercaja reforza, dende un liderazgo claro, a presencia en as zonas tradicionals d’actuación, o que proporcionará una mayor estabilidat d’o negocio en istos territorios”, matizan as mesmas fuents. Gracias a las buenas cifras de liquidez que s’asperan dimpués d’a operación -Ibercaja estima que cubrirá as suyas provisions de capital por meyos propios- as dos partes estiman que se podrá amillorar a rentabilidat.

Como condicionants concretos ta rematar a operación, Ibercaja exichirá, entre atras cosas, dotar a Caja3 d’aduyas “publicas” en forma de deuda convertible, traspasando a la Sareb (banco malo) os activos y ampres immobiliarios toxicos, de traza que ista zaguera pueda reducir as suyas necesidatz de capital. “As obligacions que puedan imposar as autoridatz en relación con o Plan de Recapitalización y Reestructuración de Caja3, con motivo d’haber recibiu refirme financiero d’o FROB, afectarán exclusivament a Caja3”, concluyen dende Ibercaja.

Fuent: http://www.aragon2.com/n-20485-503-Caja3_tendra_reestructurarse_forma_efectiva_para_fusionarse_Ibercaja

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.