“Cal salvar as comarcas mineras, no a minería d’o carbón”

Ecolochistas en Acción informa de que "o carbón ye una fuent enerchetica de gran impacto ambiental que debe y puede suprimir-se de raso en Aragón y en o estau espanyol. A inviabilidat economica d'o carbón y una deficient chestión d'os fondos publicos destinaus a o desembolique d'as comarcas mineras las han levau a una crisi permanent que solo puede resolver-se satisfactoriament con un plan d'aduyas publicas a la reconversión laboral d'os miners y a o desembolique comarcal, pero nunca no aduyando a las interpresas mineras".

(Foto: Arainfo)

Una vez mas, a causa d’a interminable crisi que padeixe o sector d’a minería d’o carbón en Espanya, somos asistindo a una ampla y intensa mobilización d’as comarcas mineras a causa d’os retalles en l’asignación de diners publicos que mantiene con vida a o carbón. As reivindicacións d’os miners tienen un amplio emparo social en as poblacións que contan con minas de carbón y tanto os interpresarios d’o carbón como practicament totz os partius politicos tradicionals, de dreita ta cucha y de cuchat a dreita, encara que sía por motivacions diferents, esfienden a continuación de l’emplego d’o carbón, y a minería asociada, asinas como una reindustrialización d’as comarcas mineras que nunca no plega de rematar.

Ecolochistas en Acción considera oportuno remarcar qualques aspectos d’o carbón que pareixen estar ixuplidaus d’una traza sistematica y cheneralizada en a discusión politica que i hai a o respecto, que son os siguients:

1. O calentamiento global d’o clima ye un problema muit grieu, que se nos eslampa d’as mans y que no admite dilacións en l’intento de mitigación. L’emplego d’o carbón, una d’as fuents enercheticas que mas CO2 emite, ye una autentica temeridat ambiental y va en contra de todas as recomendacións scientificas que se fan ta controlar os gases d’efecto invernadero.

2. O carbón tiene un gran impacto ambiental. A ran internacional contribuye a os mals ocasionaus por o cambeo climatico y a ran mas local danya o territorio a traviés d’os procesos miners. Asinas mesmo a contaminación producida por a crema d’o carbón afecta grieument a salut d’as poblacións vecinas.

3. As enerchías renovables son ta substituir a las enerchías d’orichen fosil, prencipalment a o carbón, y ta ganar independencia enerchetica. O empecinamiento en l’emplego d’o carbón, por o simple feito de tener-lo, limita o desembolique d’as enerchías renovables y frena a gran cantidat d’emplegos ligaus a istas.

4. O exceso de potencia electrica instalada en Espanya permite suprimir ya d’o sistema electrico, sin garra problema tecnico, a o carbón y a la enerchía nuclear. Manimenos isto no se fa por qüestions politicas. Os intréses economicos ligaus a la nuclear y a o carbón frenan os intréses globals en materia enerchetica y ambiental.

5. O carbón aragonés, como lo espanyol, ni ye ni será nunca competitivo a ran economico, de no estar que externalice o suyo coste social (eludindo gastos socio-laborals) y o suyo impacto ambiental, que pagamos entre totz sufrindo o deterioro climatico y a contaminación chenerada. O carbón aragonés solo sobrevive a costa de subvencions publicas.

6. L’emplego d’o carbón en Aragón va ligau tanto a o funcionamiento d’a central termica d’Andorra, que emite arredol de 7 millons de toneladas de CO2 a l’anyo (un tercio d’as emisións aragonesas), como a la futura construcción d’a central termica de Mequinenza (ya aprebada) y a termica de Arinyo (en prochecto), centrals que amás, en cremar mezclada escombrera y carbón de mina, chenerarían mayor contaminación y CO2 por kilovatio-hora produciu.

7. O carbón no ye estratechico y determina negativament o desembolique social y tecnolochico d’o futuro. A obcecación en l’emplego d’o carbón, un recurso fosil que amás plegaría por acotolar-se, impide a busca d’alternativas en o desembolique d’as economías locals implicadas y distraye recursos economicos y investigación t’o desembolique d’as tecnolochías renovables, tecnolochías que se desembolicarán en atros países y que ferán cada vez mayor a suya avantalla economico-ambiental sobre o carbón. Achugar por o carbón ye achugar por o caballo equivocau.

8. A pretensión de chustificar o futuro d’o carbón en o secuestro cheolochico d’o carbono tiene una base muit arguellada. En o supuesto caso, por contrimostrar encara, que sía tecnicament viable o secuestro subterranio en grans cantidatz d’o CO2 emitiu por as centrals termicas, ista tecnica tardaría no menos de 15-20 anyos en estar aplicable a las centrals termicas aragonesas y tendría o problema adhibiu que fería encara menos competitivo a lo carbón en destinar parte d’a enerchía liberada a o proceso de secuestro.

9. Manimenos, as grans sumas de diners publicos dedicadas a l’efecto dende fa anyos, a reconversión industrial d’as comarcas mineras s’ha feito malament, u ixo se deduz quan en as propias comarcas afectadas se diz que no tienen alternativa a o carbón. Ye necesario por tanto analisar qué s’ha feito malament, ta no repetir as mesmas errors, y depurar as correspondients responsabilidatz por iste fracaso.

Encara que en Ecolochistas en Acción d’Aragón comprenden a dificil situación d’os treballadors afectaus en o sector d’o carbón y dicen estar conscients d’o dificil contexto economico y politico en que nos trobamos, en plena enrestida neoliberal a os dreitos socials, dende Ecolochistas en Acción consideran que a unica salida que aúne a esfensa social d’as comarcas mineras con a sostenibilidad ambiental pansa por os siguients puntos:
– Cal que remate ya l’emplego d’o carbón, tanto o propio como l’importau. Solo con priorizar en o sistema electrico as fuents enercheticas menos contaminants y cesando en l’emplego d’as subvencions a l’uso d’o carbón iste cayería por o suyo propio peso.
– As comarcas mineras han d’estar aduyadas pero siempre dimpués d’un estudeo serio que determine quáls amenesten as aduyas y quáls son as prioridatz. As aduyas han d’ir ligadas a o zarre d’as minas y d’as termicas de carbón, zarre que debe fer-se no solo que por razóns economicas sino más que más por os problemas ambientals cheneraus.
– As aduyas han d’endrezar-se a os miners, a os treballadors afectaus de traza indirecto por a industria d’o carbón, y a nuevas interpresas, nunca a indemnizar a las interpresas mineras, interpresas que ya s’han lucrau prou a costa de mantener como rehens socials a os suyos treballadors y a las personas en cheneral que habitan os lugars miners.

En caso contrario as comarcas mineras prolargarán a suya agonía y rematarán, d’una traza u unatra, zarrando de toda manera las minas.

Ecolochistas en Acción senyala que una sociedat conscient d’os grieus y urchents problemas ambientals a os quals nos enfrentamos no puede permitir que siamos totz prisioners d’un sector, o d’o carbón, que nos talla una d’as pocas vías accesibles que tenemos ya ta luitar contra o cambeo climatico, luita que requiere imprescindiblement reducir as emisions globals de CO2 .

Fuent: http://www.ecologistasenaccion.org/article23597.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.