Calatayú enguera cambeos en o bus de linia

O Concello ha desenvolicau un plan piloto ta iste transporte que funcionará dende chinero dica chulio de 2012 y con o que se recuperan horarios, s'adhiben aturadas y recorrius y se creyan bonos descuento.

Anvista de Calatayú (Foto: Biquipedia)

Anvista de Calatayú (Foto: Biquipedia)

O Concello de Calatayú ha introduciu una serie de modificacións en a traza de funcionar d’o bus de linia t’achustar millor o servicio a la demanda d’os ciudadáns. Asinas, o Consistorio ha desenvolicau un plan piloto ta iste transporte que funcionará dende chinero dica chulio de 2012 y con o que se recuperan horarios, s’adhiben aturadas y recorrius y se creyan bonos descuento. “A o Concello le cuesta 120.000 euros a l’anyo mantener o bus de linia, pero ha decidiu que ha d’asumir-lo por as caracteristicas d’a ciudat. Encara que no dentra aintro d’as suyas obligacións, pues Calatayú no cuenta con 50.000 habitadors”, ha explanicau l’alcalde bilbilitán, José Manuel Aranda.

Por ixo, o Concello ha meso en marcha un plan piloto ta iste transporte que se mantendrá de preba dica o 31 de chulio de 2012. As modificacións introducidas con dito plan son relativas a os recorrius, tarifas y frecuencias. Por eixemplo, “o servicio más demandau, que ye o que circula dica l’hespital, tien agora una frecuencia de 30 minutos mientras as horas punta, que se va enamplando a resta d’o diya dica os 40 minutos”, ha senyalau Aranda.

D’atra man, os viernes de tadis, sabados y domingos s’han feito bells cambeos por o menor emplego d’o bus “y tamién ta ufrir servicio dica puestos esportivos y d’ocio”, ha apuntau l’alcalde. A más, s’han introduciu todas as tardis recorrius dica la Ciudat Esportiva, dende as 16.45 dica las 20.45 horas. Dende iste inte, s’enampla o servicio y o bus plegará dica o vico d’a Consolación, o campo de golf y a zona comercial de Decathlon. Tamién tornan as aturadas que feba en o vico de San Antón y en l’hespital a zaguer hora (a las 21.45 y a las 22.00 horas) os cabos de semana.

Sobre os prés, s’ha creyau un bono descuento que aminora lo pré de cada viache a 0,65 euros ta pensionistas y mayors de 65 anyos y a 0,80 euros ta la resta d’os ciudadáns. A más, dito bono no tien caducidat .

D’atra man, os estudiants que residan en o vico de San Antón y acudan a institutos que se troben en atros puestos d’a ciudat, asinas como los que vivan en a ciudat y sigan matriclaus en o colechio Baltasar Gracián, se beneficiarán d’un descuento que aminorará o pré de cada viache a 0,65 euros.

Fuent: http://www.comarcas.es/index.php/mod.noticias/mem.detalle/idnoticia.6645/relcategoria./chk.62388d88fc1c0fc0cb96833e40e42d57.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.