Cameron bate as enqüestas y logra a mayoría absoluta en o Reino Uniu

O SNP ye o segundo gran vencedor en haber lograu arrebatar-le quasi a totalidat d'as cadieras escocesas a os laboristas

David Cameron (Foto: Prime Minister's Office)

David Cameron (Foto: Prime Minister’s Office)

Reino Uniu ha votau por cinco anyos mas d’austeridat. Luen d’o que afirmaban as enqüestas mientres a campanya, o recuento ha dau a os conservadors a mayoría absoluta y ha deixau fuera de chuego a os laboristas y liberal-democratas, que os suyos liders, Ed Miliband y Nick Clegg, han presentau a dimisión.

Con mas de 640 d’os 650 puestos escrutaus, os conservadors superan as 330 cadieras (a mayoría absoluta ye en os 326); os laboristas, 232; o Partiu Nacional Escocés (SNP), 56; o Partiu Unionista Democratico (DUP), 8; os liberal-democratas, 8, y l’UK Independence Party (UKIP), 1.

O recuento d’os datos no ha rematau, pero a mayoría absoluta confirma que l’achuste fiscal mas drastico d’a Unión Europea estió ahiere revalidau en as urnias por os votants de Reino Uniu.

Como yera previsible, o lider laborista, Ed Miliband, ha anunciau iste viernes a suya dimisión a o frent d’o partiu dimpués d’o mal resultau obteniu por o suyo partiu en os comicios. “Reino Uniu amenista un Partiu Laborista fuerte”, ha defendiu Miliband, proposando que Harriet Hartman prenga as riendas d’o partiu dica que se designe a o suyo sucesor.

Iste ye un revés espectacular t’os laboristas“, comentaba ista maitinada Tony Travers, profesor d’a London School of Economics. En efecto, as cosas pintoron malament ta Ed Miliband dende o prencipio d’a nueit. Os pronosticos de redota no han feito que confirmar-se en o transcurso d’a maitinada.

O gran truco plegó luego, en nomás zarrar os colechios electorals. No heba pasau un minuto dimpués d’as 22:00, quan BBC, Sky News y ITV daban treslau d’o resultau conchunto d’os suyo sondeus a piet d’urnia. O sondeu atorgaba a os conservadors 316 cadieras; a os laboristas, 239; a o Partiu Nacional Escocés, 58; a os liberal-democratas, 10; y a UKIP, 2.

Ixos numers no solament s’han confirmau, sino que han amillorau t’os conservadors.

As caras d’os asistents a la fiesta d’o recuento electoral de Little Atoms en o centro de Londres, un lobby d’influencia progresista, prencipioron a fer-se largas. No ye d’extraniar: en 2010, os resultaus a piet d’urnia acertoron quasi de pleno en o resultau, solament erroron en siet puestos.

Tanta credibilidat le heban dau a ixe sondeo a piet d’urnia que, pocos minutos mas tarde, o Daily Mirror ya heba trigau a suya portalada de hue: un quadro en negro con una pregunta “Five more damned years?” (¿Cinco maldaus anyos mas?).

A las 2:44, a BBC ya se preguntaba si o laborismo amenistaba un nuevo lider. “Si os resultaus remaneixen asinas, de maitins i habrá presions muit fuertes ta que Ed Miliband renuncie”, diciba o comentarista politico Nick Robinson.

A las 5:10 d’o maitín, charraba l’atro gran perdedor d’a nueit. “Ya ye dolorosament claro que ista nueit ha estau un castigo crudel t’os liberal-democratas“, comentaba o suyo lider, Nick Clegg. Con l’abance d’o recuento, a reconoixencia d’os malos datos se feba en una dimisión.

O lider d’a formación que ha compartiu coalición de Gubierno con David Cameron ha anunciau a suya renuncia dimpués de comprobar como o partiu ha perdiu 48 d’as suyas 56 cadieras. A tamás d’ixo, ha defendiu a “contribución” d’os liberal-democratas entre a zaguera lechislatura.

“Si o que hemos perdiu hue se veye compensau por cada familia que se siente mas segura por un emplego que haigamos aduyau a creyar, por cada parella gai que sabe que o suyo amor no vale menos que o de garra atra y por cada pensionista con un poquet mas de libertat y dignidat en o retiro, confito que as nuestras perdas puedan sobrelevarse con un poquet mas de dignidat”, ha dito Clegg.

O partiu independentista arrasa en Escocia

Pero si os conservadors pueden estar contentos, o Partiu Nacional Escocés ha aconseguiu o que ye talment o resultau mas impresionant d’a nueit.

Como a mayoría d’as enqüestas heban previsto, o Scottish National Party (SNP) ha aconseguiu obtener a mayoría d’os puestos en o norte d’a buega. Escocia ye un bastión tradicionalment laborista que a suya hechemonía politica ha cambiau de raso iste 7 de mayo. Si antes o mapa politico yera de color roya en o norte, ista nueit os votants le han dau a vuelta de tot. Ya a las 8:00 d’o maitín heba feito suyos 56 d’as 57 cadieras a las quals optaba.

I hai un lión ruchindo en Escocia iste maitín y garra gubierno que s’estableixca en Westminster será capable d’ignorar-lo“, ha dito ista maitinada Alex Salmond, l’anterior lider d’o SNP y exministro prencipal que levó a Escocia a la convocatoria de l’historico referendum d’o 18 de setiembre.

Dende maitín, o partiu independentista de Nicola Sturgeon ocupará un puesto muit relevant en Westminster, o que ubre una gran caixa de Pandora sobre o nuevo y extranio equilibrio de gubierno en o país. A gran pregunta ye: ¿dará Cameron nuevos poders y mas independencia a Sturgeon, como prometió antes d’o referendum? Con un innegable emparo en o norte d’a buega, ¿quánta devolución de poders será suficient ta no menazar con unatro referendum?

Fuent: http://www.eldiario.es/politica/conservadores-aventajan-laboristas-mayoria-escrutada_0_385661551.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.