Campanya de Medicos d’o Mundo refirmando a obcheción de conciencia d’o personal sanitario

A campanya preba de luitar contra que os migrants tiengan rebaixaus os dreitos sanitarios

logoMedicos d’o Mundo ha prencipiau a campanya ‘Dreito a curar’ que prebará de sumar refirmes de profesionals d’a salut t’a obcheción de conciencia contra a exclusión sanitaria d’os migrants en situación irregular. A ONG ha anunciau movilizacions contra o Reyal Decreto Lei que deixará sin acceso a lo sistema publico sanitario a muitas personas sin permiso de residencia dende o venient 1 de setiembre.

A iniciativa se suma a la d’a Sociedat Espanyola de Medicina de Familia y Comunitaria (SEMFYC) que arrocla ya más de 1.300 profesionals en a debandita obcheción. Seguntes o president de Medicos d’o Mundo, Álvaro González, “Queremos que o personal sanitario reivindique, exerza o suyo dreito a la resistencia y a curar a toda persona que le calga, independientement d’a suya situacióna administrativa.”

A ONG ha creyau una pachina web rebutient de material: www.derechoacurar.org, dende a on que antimás se puet sinyar una carta endrezada t’a ministra espanyola de Sanidat, manifestando o refús a lo Reyal Decreto.

Cuanto a la lechislación, dende a organización remeran que “Dende o Churamento Hipocratico dica la adopción en 1948 d’a Declaración de Chinevra de l’Asociación Medica Mundial (AMM), a profesión medica ha expresau en forma de codigo deontolochico o suyo compromís con a misión de proteixer a salut sin garra mena de discriminación”. Tamién remeran a Declaración de Lisbona d’a AMM sobre os Dreitos d’o pacient, que diz que “Quan a lechislación, una mida d’o gubierno, u qualsiquier atra administración u institución niega istos dreitos a lo pacient, o personal medico ha de mirar os meyos apropiaus ta guaranciar-los y restablir-los”.

Medicos d’o Mundo considera que a reforma “suposa un grau retacular en terminos d’os dreitos socials y refusa as chustificacions ta prener ista mida. “Son muitos os estudios que contrimuestran que as personas migrants fan servir menos os servicios sanitarios que no a población espanyola”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.