Candle, o mundo d’as aquarelas feito videochuego

En as oficinas de Teku Studios, en Teruel, s'ha desenrollau o primer videochuego realizau de tot con aquarelas

TEKU-STUDIOS-candleDe 2011, dimpués d’un largo periodo d’aventuras, naixe Teku Studios. Un estudio independient de desenrollo de videochuegos fundau por dos estudiants universitarios con una pasión comuna, os videochuegos.

De chunio d’ixe mesmo anyo, se fan ganadors d’o I Concurso Emprendedor Universitario d’a Universidat de Zaragoza, con o suyo primer prochecto ‘Proyect Light’. Y de noviembre de 2011, en o marco d’as Chornadas Emprendedoras d’a Universidat Carlos III de Madrit, aconsiguen una mención especial d’a man d’o ministro d’Educación, que ratifica o buen treballo realizau con l’anterior prochecto.

De chunio de 2012, Teku Studios se fa con a reconoixencia maxima en a categoría d’Industria en a XX edición d’o Concurso Idea. Dos meses dimpués, y en vista de l’exito aconseguiu, prencipian a treballar en un local propio dentro d’as instalacions d’o CEEI en Teruel. De setiembre, Teku Studios se transforma definitivament en empresa y de mayo de 2013 tres personas mas s’incorporan a o prochecto.

Pero no ye dica chulio de 2013, quan o prochecto inicial ‘Proyect Light’ deixa de tener nombre en clave pa fer-se Candle. Ye alavez, quan dende Teku Studios deciden lanzar una campanya de crowdfunding con a que dar viabilidat a Candle y rematar asinas o desenrollo d’o videochuego. Un mes dimpués, d’agosto, a campanya ha aconseguiu un exito absoluto y a recaudación asciende dica os 52.359 dolars gracias a l’aportación economica realizada por 1.653 personas.

Qué ye o que ofreixen con os suyos chuegos? “Como desenrolladora independient que somos, podemos asumir risgos chugables que atras companyías no pueden. O mercau indie ye contrimostrando que se pueden fer chuegos con ideyas innovadoras y frescas, fendo-se chicotas choyas a pesar d’os suyos inferiors medios economicos”, reconoixen en a suya pachina web.

Actualment, l’equipo ye compuesto por seis personas que treballan conchuntament en o proceso creativo. Miguel Vallés, naixiu de Uesca, ye o Chefe de Programación y cofundador d’o estudio de conchunta con o suyo companyero José Antonio Gutiérrez, Chefe Creativo de Teku Studios. Pascual Gallego, compositor de mosica profesional; Elena Benedí, disenyadora grafica y encargada d’o diseño d’interfaces; Íker Mateo y Juan Diego Alegre completan l’equipo de Teku Studios.

“O nuestro obchectivo ye incorporar iste tipo d’ideyas a o desenrollo por medio de tecnicas tradicionals y artisticas. Queremos aprofitar o que as nuevas tecnolochías de desenrollo pueden aportar a os videochuegos 2D. Por ixo, somos utilizando materials como aquarelas, acrilicos, tintas y collage pa que a estetica d’os nuestros chuegos sía unica y experimental”, afirman.

“A intención ye que o chugador se sienta parte d’una historia, que desfrute no solament chugando, sino experimentando con o que ye veyendo, con as suyas colors, as suyas tacas de pintura, por cómo se mueve cada animación”, sinyalan en a suya web. Y continan explicando, “queremos no solament que te diviertas, queremos que tiengas una experiencia estetica. Totz istes son pus os obchectivos d’o nuestro equipo: arte, experimentación y ideyas chugables y novedosas”.

Candle, ye un videochuego desenrollau de tot dende un proceso de pintau artesanal de totz os graficos d’o chuego, con aquarelas y fotograma a fotograma, y que saldrá a o mercau iste verano. Pa Miguel Vallés, “o chuego se fa una aventura grafica muit dinamica. Hereda o esprito d’aventuras cinematograficas clasicas como Out of this World u Flashback, y a mecanica de chuegos d’aventuras de plataformas como Abe’s Oddysee y Abe’s Exoddus, u Heart of Darkness”.

Manimenos, explica Vallés, “nusatros queremos que vaiga un paso mas enta allá, y por ixo hemos reuniu todas as caracteristicas clau d’os chuegos pa creyar un titol solo centrau en a resolución d’enigmas y puzzles, pero de vez con un control moderno y dinamico sobre o personache”. O debuixo, realizau sobre aquarela, provoca que a conchunción que ofreixen as diferents texturas d’a pintura de conchunta con os movimientos d’os personaches, anyada un punto artistico a o chuego.

Ista aventura grafica se desenrolla en un mundo imachinario, “y a caracteristica mas important d’o chuego proviene d’una qualidat muit concreta de Teku, o personache prencipal”, indica Vallés. O personache, “en cuenta d’una man, porta una vela –candle- que se puede activar en distintas situacions y pa ixo ha de fer o que pueda pa que ista no s’amorte”. A flama d’a vela ye clau pa resolver muitos d’os puzzles, asinas como o descubrimiento de muitos d’os secretos d’o chuego.

En definitiva, un chuego pa desfrutar de todas as suyas imperfeccions, as que ofreixen de traza natural os debuixos realizaus sobre aquarela, y que de vez lo fan un chuego unico y pionero dentro d’un  mundo tant exichent como ye o d’os videochuegos. En iste enlaz se puede desfrutar d’un chicot documental con formato de making of de Candle. Una marabilla.

Sergio Gracia Solanas pa AraInfo.

Fuent: http://arainfo.org/candle-el-mundo-de-las-acuarelas-hecho-videojuego/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.