Cañete torna a deixar Aragón sin decreto de sequera

Totz os partius y organizacions agricolas penan por o refús d'o ministro espanyol d'agricultura

Cañete y Lobón (Foto: D.Ch.A.)

Cañete y Lobón (Foto: D.Ch.A.)

O Ministerio d’Agricultura, menau por Miguel Arias Cañete, ha tornau a refusar o decreto de sequera o pasau lunes en a conferencia sectorial t’a on que fue Modesto Lobón, conseller d’agricultura d’a D.Ch.A. Lo chustificó por a “falta de diners”. Lobón demandó, alavez, una orden ministerial ta que os agricultors accedan a creditos subvencionaus, lo que o ministro dició que “estudiaría”.

Ista decisión plega dimpués d’haber-se presentau l’estudio que replega unas perdas de más de 277 millons d’euros -100 en regano y 177 en secano- debidas a la manca de plevias, y de que as Cortes aragonesas demandasen o debandito decreto dos vegadas por unanimidat de todas as collas parlamentarias.

As declaracions de refús ta ista decisión han plegau, con más u menos rasmia, dende totz os cabos. O PSOE, en boca de Javier Sada, aspera que “s’estima más de pensar que [ista mida] no ye una vendetta d’o ministro” en remeranza d’os pasaus conflictos con Aragón quan se aprebó o PHN d’o PP. Nieves Ibeas, de CHA, ha demandau a Lobón que se’n traiga “d’a orella, si cal” a Cañete t’Aragón “ta que veiga a sequera con os suyos propios uellos si no se la creye. De man de IU, Adolfo Barrena, fendo referencia a lo pasau debat de l’estau d’Aragón, a demandau a la presidenta Rudi que se “rebele” contra o “desprecio” de Cañete. Manuel Blasco, d’o PAR, que refirma lo gubierno d’o PP,  piensa que ye “penible que diga que no bi ha diners” y creye que bi ha “formulas ta conseguir-ne”.

Tamién as organizacions agricolas como UAGA (Unión d’Agricultors y Ganaders d’Aragón), ARAGA (Asociación Rechional de Argicultors y Ganaders d’Aragón y UPA (Unión de Chicotz Agricultors) han lamentau ista refús a lo decreto. UAGA demanda a la D.Ch.A. que faiga convenios con entidatz financieras ta mirar de solucionar la venient campanya. Dende ARAGA demandarán explicacions a lo ministro y UPA ya ha manifestau que bi habrá un “hibierno movidet” con movilizacions y protestas.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.