Canfranc torna a demandar a reobridura d’o tunel ferroviario y milloras en a linia

Coincidindo con o 85 cabo d'anyo de l'enguero d'a linia internacional Canfranc-Aulorón, centenars de personas se concentroron pa demandar a reobridura y milloras en a linia enta Zaragoza

concentración tren Canfranc

Foto: Noé de Pablos

Unas docientas personas se concentroron ahiere en a estación internacional de Canfranc pa demandar a reobridura d’a linia internacional Canfranc-Aulorón, 85 anyos dimpués d’o suyo enguero, trancada dende 1970 por o fundimiento d’o puent d’Estanguet en a val occitana d’Aspe. Dende alavez, muitas promesas dende a esfera politica pa la reobridura pero con nulos resultaus.

A convocatoria estió organizada por a Coordinadera por a Reobridura d’o Ferrocarril Canfranc-Aulorón (CREFCO) chunto a la suya homologa francesa CRELOC. Benjamín Casanova, portavoz de CREFCO, demandó “a os politicos que fablen menos y se comprometan d’una vegada a meter maquinas treballando en a vía“. Casanova considera que ye o momento pa la reobridura, pues Francia descarta mas prochectos d’alta velocidat “o que repercute en os pasos de muga y en a construcción d’a TCP”.

esfendamos o trenManimenos, o prochecto no pareixe contar agora con buena opinión dende l’atro costau d’a muga. Fa poco s’ha conoixiu l’informe negativo d’una enqüesta d’opinión realizada respective a o tramo ferroviario Aulorón-Bedós. Jacques Courate, representant de CRELOC considera que ye una noticia negativa pero s’amuestra optimista respective a la realización d’ixe tramo ferroviario. Tamién l’alcalde de Canfranc, Fernando Sánchez, consideró o resultau d’ista enqüesta un duro revés, considerando que heba estau dirichida pa que diese ixe resultau.

Tanto Fernando Sánchez como Benjamín Casanova se refirioron a ista enqüesta que considera que “ye muita inversión pa poco resultau” (120 millons d’euros d’inversión pa uns 10 viachers cada diya, seguntes a enqüesta), afirmando que “o Canfranc no se puede veyer por tramos isolaus, sino que cal alufrar-lo como una linia internacional“, considerando o suyo potencial pa lo transporte de mercancías entre Francia y Espanya.

la foto 253

Tamién as ciclistas reclamoron puyar a os trens con as bicis de baldes y con un servicio de calidat. Foto: Noé de Pablos

Asinas mesmo reclamoron inversions en a vía entre Zaragoza y Canfranc, mas que mas en o suyo tramo dillá de Uesca, con unas infraestructuras muit viellas y en un estau “penible”, amás d’uns trens que tampoco no cumplen con unas minimas condicions, seguntes constató o representant de CREFCO. Una linia, chunto a la linia Zaragoza-Chaca, que con os zaguers retalles cada vegada mas se son viyendo a la craba roya y podrían rematar desapareixendo.

En l’acto, como representants politicos se podió viyer a Adolfo Barrena d’IU, Joaquín Palacín de CHA u a diputada d’o PP en o Congreso, Blanca Puyuelo.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.