Caracol Zaragoza celebra o VI festival solidario con Chiapas en o XX cabo d’anyo d’a insurrección

Mientres toda la chornada bi habrá actuacions de toda mena: circo, mosica, teatro, ...

cartelIste sabado 11, Caracol Zaragoza torna a celebrar o suyo ya tradicional Festival de Teatro solidario con Chiapas (Mexico) en o Centro Civico Almozara. Como en as anteriors cinco edicions, mientres tot lo diya bi habrá mosica, acrobacias, cuentacuentos, teatro, malabars, humor y machia, con a presencia de más d’una vintena d’artistas.

Ista edición plega antimás en una calendata bien sinyalera, en fer-se ya vinte anyadas dende que “centenars d’indichenas prenesen siet cabeceras municipals en l’estau mexicano de Chiapas chilando “ya ye prou”, coincidindo con a dentrada en vigor d’o Tractau de Libre Comercio entre Canadá, Estaus Unius y Mexico”, remeran dende o Caracol Zaragoza.

O festival tendrá dos sesions, de maitins y tardis, a on que totz os publicos podrán tener o suyo espacio. De maitins, en a sesión infantil, actuarán Pato y Encarna con “Istorias de pocha, un cantacuentos”, Wuatu con “Colors en chuego” y o circo d’a Companyía D’Click. A sesión de tardis, ta publico adulto y presentada por Jota, ex-cantaire de Ixo Rai!, prencipiará con a danza y os malabars d’Edu, y continará con o circo de Valera, a Machia de Funny Magic Creepy Show, a humor negra de Los Mancusos, o Eco dúo mosical de Vegetal Jam y a mosica de Cállese Señora (Tributo a Siniestro Total) y o Comando Cucaracha. O bono de refirme ta lo maitin tien un pre de 4 euros, t’a tardi de 5 € y ta toda la chornada de ueito.

A organización d’o festival remera os trangos enta debant que s’han dau en o territorio zapatista en istas vinte anyadas y as suyas demandas “treballo, tierra, teito, virolla, salut, educación, independencia, libertat, democracia, chusticia y paz”. “Muito han enantau as y os zapatistas ta conseguir istas demandas nunca no ascuitadas y antimás represaliadas por os malos gubiernos mexicanos y que han propiciau a construcción de l’autonomía zapatista, a on que o pueblo manda y o gubierno obedeixe”, esfiende Caracol Zaragoza.

Iste anyo tamién ye estau especial por a celebración d’a Escuelita Zapatista, un evento organizau “por as y os zapatistas” a on que “querioron fer-nos participar en a suya historia” y que “i han asistiu millars de personas en as comunidatz indichenas en resistencia y tamién a traviés d’internet”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.