Cargar baterías con a wi-fi?

Un equip universitario norteamericano ha experimentau con un 'router' que da connexión a internet y de vez recarrega chicotz aparatos electronicos

9 junio, 2015 | Sciencia/Tecnolochía | Autor: Arredol | Tweet

Un d’os grans problemas d’os numerosos aparatos electronicos que cada día nos rodian mas ye a duración d’a batería. A ormino hemos d’arrocegar toda mena de cables ta poder-los cargar quan se les acaba l’autonomía. O desafío, pus, ye trobar a millor solución ta recargar-los. Un equipo d’a Universidat de Washington treballa en un enrutador wifi que, amás de dar connexión a internet inalambricas, alimenta a batería de chicotz widgets electronicos situaus a menos de diez metros.

O ‘router’ utilizau, baltizau con o nombre de PoWiFi, modifica o sinyal d’o ret wifi en corrient d’enerchía con l’aduya d’un convertidor DC a DC. O widget s’ha disenyau pensando, mas que mas, en a creixent internet d’as cosas.

En un articlo recient os autors de l’aparato explican que l’han prebau en seis fogars norteamericanos con buenos resultaus: en a mayoría de casos, dicen, l’uso de l’enrutador ta pasar-ie corrient no ha rebaixau o livel de connexión a internet ni la ha interferida.