‘Cariñena’, a segunda novela de ‘El Vino de las Piedras’, plega a o publico d’a man d’Antón Castro

Una obra que relata a plegada d'un choven gallego dica a vendema. Entre a suya estancia en tierras zaragozanas vivirá a intensidat de trobar un treballo u as emocions de conoixer a o que podría estar l'aimor d'a suya vida

Dimpués d’a publicación en 2011 de ‘Dulces piedras escondidas’, a Denominación d’Orichen Carinyena ha dau a conoixer a segunda novela d’a colección El Vino de las Piedras: ‘Cariñena’. Una obra elaborada por l’escritor y periodista aragonés Antón Castro, en que as suyas 120 pachinas y 21 capitols se narra a importancia d’a cultura, l’amistat, o vin y especialment a poesía.

Se tracta d’a novela d’a experiencia vital d’un choven de 19 anyos que decide de continar o camín d’a obchección de consciencia y que eslampa d’a suya Galicia natal ta plegar dica a vendema de Carinyena, una estancia que prolarga entre diez días en 1978. Una vegada allí conoixe o mundo d’o vin, os detals d’a historia de Carinyena, d’a redolada y aduerme en as grutas-bodegas d’o lugar mientres aspera que le den o suyo primer treballo. Mientres remaneixe en Carinyena, o protagonista d’ista segunda obra conoixe a un estudiant d’Historia y a dos mesachas que le fan soniar con l’aimor y, talment, con o sexo.

A novela, de ritmo achil, ye plagada de personaches; entre ells o viticultor Mainar, enamorau y casau de Palmira: ell encarna a conoixencia d’a tierra y d’os vinyeros. Y exercerá una influencia decisiva en o choven. Amás, como no podeba estar d’atra traza, o cierzo tamién tien un protagonismo especial, convertindo-se en desencadenant d’a historia. A lo largo de toda a obra se refleixa a situación social, cultural y politica d’a Espanya de 1978 y china-chana se veye como o protagonista va creixendo, trobando amigos y enamorando-se d’os vinyeros, a vit y as tierras carinyenencas.

“O libro ye una narración lineal, clarament cheneracional. Fabla de l’aspera, a esperanza y as deleras d’a Democracia. Se tracta d’una novela d’aimor a o paisache, a o territorio, a os cielos imponents; ye un libro d’aimor a Carinyena y a Zaragoza”, asegura Castro, que define o suyo libro como “fluyiu, con un intrés que no decaye” gracias a que ye elaborau sobre l’alazet de capitols curtos.

A DO Carinyena apuesta por a cultura

A lo largo d’a suya historia, os responsables d’a Denominación d’Orichen Carinyena siempre han apostau por iniciativas culturals como ista colección de narrativa, as becas de formación t’a cultura d’o vin que atorga dende l’anyo 2008 a totz os alumnos que superan os ciclos en Vitivinicultura y Elaboración de Vins y Bebidas que s’imparten en l’instituto carinyenense Joaquín Costa, u la “Aduya d’Investigación arredol d’a Cultura d’o Vin”, una iniciativa conchunta d’a Facultat de Filosofía y Letras d’a Universidat de Zaragoza y a D.O.P. Carinyena. Gracias a ista aduya s’han feito bells treballos d’investigación que posteriorment han estau editaus como publicacions. Tot ixo se complementa con as exposicions d’arte que, a lo largo de l’anyo, se celebran en o Museo d’o Vin d’a localidat zaragozana.

Fuent: http://www.aragon2.com/n-20260-705-Carinena_segunda_novela_Vino_Piedras_llega_publico_mano_Anton_Castro

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.