Carlos Azagra: “Antis más bi heba censura politica y agora bi’n ha d’economica”

L'autor de Pedro Pico & Pico Vena nos da a suya anvista sobre o comic y a politica

azagraCon a enchaquia d’o Salón d’o Comic de Zaragoza, Carlos Azagra presentó o sabado 15 de maitins o suyo nuevo treballo “Los jueves al sol” con os suyos conoixius personaches Pedro Pico y Pico Vena. Sobre istas y atras cosas nos charró.

Arredol: Presentas hue “Los jueves al sol”, ¿qué imos a trobar-nos-ie?

Carlos Azagra: Un poquet de tot. Más que más sorpresas, porque bi ha cosas que no han saliu publicadas, historietas ineditas de Malavida, cosas que encara que han saliu en blanco y negro, bi apareixen coloreadas por la Revuelta, fotos d’os personaches reals, cartels,… Sobre tot mira de sorprender. Talment tot muito comprimiu, pero ye que yo siempre soi estau muito comprimiu. I he ficau muita información.

Ye o millor libro que me han editau, en iste caso Malavida, y que les n’agradeixco porque he puesto quitar ista cosa que ye bella mena d’autohomenache a una epoca que yeran los 80 quan no bi heba movils ni internet y a chent funcionaba quasi millor que no agora con tanto internet.

Arredol: Levas una patacada d’anyadas debuixando comics, ¿cómo has visto a evolución d’iste mundet en Aragón?

C.A.: Me fa goi que bi haiga movida, que bi haiga nuevas valors, chent choven y fresca. Talment en o caso mío yera más complexo, porque d’antis más se levaba más os temas políticos, socials y tal, y d’ixo agora bi’n ha menos. Pero ixo tamién ye bien porque o comic no ha d’estar lo que uno creye, sino lo que a uno le surte. Talment agora ye puenda de vacas ixutas, porque no bi ha salidas t’o comic, pagan poco, en os periodicos forachitan chent… A chent publica quasi de baldes… que ye o futuro: treballar de baldes.

Con tot y con ixo, en un periodico, lo primer que se lei la chent que o debuixet. Ye asinas.

Arredol: ¿Pensabas que podeba plegar a haber-ie en Zaragoza un Salón d’o Comic como o que bi ha agora?

C.A.: A verdat ye que no. Dende que prencipió en l’Almozara que yera como una botiga de tebeos a lo que ye agora… ¡Chapeau! Antimás en tiempo de crisi, mantener isto ye toda una chesta y ixo cal reconoixer-lo. Y antimás a baixo coste, que sale bien barato. Más que más, contimparando con atros salons que se gastan bien de perras. Ye muito bien y sisquiá contine existindo.

Arredol: ¿Creyes que l’arte ha de tener un conteniu político u ye nomás una opción personal tuya?

C.A.: Ye personal. De feito agora a cosa apolitica tamién ye politica. Os relatos de ciencia ficción tamién son política. Lo que pasa ye que a política agora tien mala prensa. De todas trazas a yo siempre me fa más goi lo social que no lo politico. D’a politica ya no’n entiendo mica. De feito no leigo o periodico ni veigo a televisión porque la enchegas y te’n carranyas que ta qué. M’estimó más de viyer cintas. Que se me yo: “Cantando baixo a plevia” que me la meto muitas vegadas t’animar-me.

De todas trazas o tebeo ye a realidat. Tu ubres a prensa y viyes os banquers lo que fan, os chuicios, … ye una aventura diyaria. Ye o “Pulgarcito”. Y si no estase por lo que ye, t’aganaría de redir-te-ne porque a verdat ye que ye penible. Porque lo que ye pasando en o nuestro país, o saqueyo que bi ha, os banquers, … fan ganas de plorar porque te son hipotecando a vida y se quedan tan tranquilos. Isto como no vienga belún y lo apanye. Bell Superman u que se me yo…. ¿Viyes? Cal un superheroe. A realidat ye un comic.

Cal foter un trucazo. Igual como lo d’a guillotina y tot ixo. En Francia funcionó. Aquí no bi ha habiu guillotinas, y habría d’haber-ne. Somos un país atrasau. Sisquiá Espanya s’hese afrancesau.

Arredol: Has treballau en revistas y fancines, has colaborau con organizacions, has feito cartels, portaladas de discos,… ¿qué te fería goi de fer que no haigas feito ya?

C.A.: Ye plegando una película en 3D que van a fer en Valencia. He visto as prebas y van a quedar muito pinchas. Yera un curto con una canta de tres minutos y ya yeran conseguidas as voces: Evaristo de La Polla Records, Manolo Kabezabolo y Tonino Carotone. Pero se prolargó. Vino chent de Hollywood y quereban un largometrache. A cosa se vinió enta abaixo porque os zagals se tricolotioron, quereban que Evaristo charrase en anglés, …. En a banda sonora bi ha como diez collas que ya han feito cantas: Ataque 67, d’Archentina, collas d’Alicante, muito punki y hardcore, una colla heavy de Murcia, … A banda sonora ya ye feita. A cosa va a monico porque a producción la fa un zagal en Valencia y la fa de baldes y s’ha de ganar as perras fendo publicidat. Uno ha de fer lo que no quiere ta poder fer lo que quiere.

Talment tamién me fería gracia publicar en prensa escrita, en bella depeixa. De fer critica de lo que bi ha. En Barcelona, me lo han proposau bella vegada.

Arredol: ¿Qual ye o zaguer comic que has leyiu? ¿Qual recomendarías?

C.A.: Pues lo de Harry Clever, de Chema Cebolla, me ha encantau. Ye novela negra escrita aquí. Ye una maravilla. Y l’album que m’encanta de recomendar, encara que ye de fa bell par d’anyadas ye “El arte de volar” de Kim. Me fa muito goi.

Arredol: Si prencipiases agora a escribir Pedro Pico y Pico Vena, ¿serían punkies tamién?

C.A.: No, no, no. Serían heavies. Yo quereba fer “o capín d’a barra”, pero me dició Gin “no, no, mete-ie punkies que son de moda” Y le dicié “¿pero ixo que ye?”. Bien se vale que en Santa Barbara teneba un bar de punkies y skins. Bi heba un punky y un skin. Yera l’inte Oi que dimpués dengún no lo entendió, que se pensaban que yeran fachas y tal…

Pero yo fería dos personaches heavies porque son los que más representación tienen en toda Espanya. Tú vas ta un lugarón perdiu de Cordoba y siempre bi habrá un guariche heavy. En qualsiquier puesto siempre bi habrá un guariche heavy. Manimenos, os punkies u os skins son muito localizaus: Madrit, Barcelona, Bilbao, Valencia. Ye tot muito localizau en o País Vasco porque quan prencipió a cosa punky yera más que más arredol d’o rock radical vasco que astí funcionaba. Os temas d’as radios libres, as okupacions, os gaztetxes, os fancines…. Os heavies no feban ixa mena de cosas pero manimenos yeran por tot. Y antiparti, sí que son concienciaus. Toda la chent se piensa que ye nomás estetica, chambretas y tal, pero no.

Arredol: As ilesias cristiana, chodiga y musulmana se han queixau por vinyetas, “El jueves” estió secuestrau fa poco, tu mesmo teniés bell par de chuicios, … ¿Qué tien o comic que tanto molesta a la ilesia y a o poder?

C.A.: Quan te rides d’o más sagrau te trobas problemas. Efectivament yo he teniu chuicios de man d’a ilesia catolica. A yo l’Islam no m’ha feito cosa, pero pienso que si me redise de l’Islam me tallarían o tozuelo u me meterían una bomba debaixo de casa. De feito “El jueves” fació una portalada en solidaridat con Charlie Hebdo y los d’o Grupo RBA se les miraban mal. Os d’a revista Lecturas son en a planta chusto alto de “El jueves” y yeran acollonaus. Ni se les miraban porque teneban miedo de que les metesen una bomba por a suya culpa.

¿Solución? Agora los de “El jueves” no publican mica d’ixo. Ni lo tocan. Ye un tema tabú porque bi ha un miedo real.

Yo me rido d’a relichión catolica que ye la que hemos teniu.

Bi ha temas que a humor se les eslampa y sobre tot a humor dibuixada. Porque tú puetz recontar un chiste y no ye tanchible. En os periodicos de fabla arabe no bi ha imachens dibuixadas. Fotos sí, pero no imachens. Yo en Libia me moriría de fambre. Y antimás bi ye mal visto zorriar, asinas que au!

Arredol: ¿Bella vegada t’has autocensurau?

C.A.: Muitas vegadas. En zagueras encara más. Antis más bi heba censura politica y agora bi ha censura economica. De feito ista semana, en un cartel de fiesta mayor d’o mio vico, de Sant Martín, me censuroron porque bi heba un mesache correndo con una chambreta con una estrela de cinco puntas y me la facioron sacar-ne. Deciban que ixo yera politico y que no me censuraban pero que no me pagaban o cartel. Ye una mena de censura economica.

Ye lo que me facioron en “El Jueves” con a parola VomiStar. Yeran en vada os forachitaus de Telefónica y lo metié y me clamó l’editor de “El jueves” decindo “Azagra, ixo no puet salir, pero nusatros no te censuramos, eh?”. Habié de retallar a vinyeta y calar-ie atra cosa. No puetz criticas a qui te da de minchar a qui se bi anuncia.

A censura existe. Ye más subliminal, pero bi ye.

Carlos Azagra: Yo pensaba que me ibas a preguntar por “a fabla”. Yo he feito cosas en “fabla”.

Arredol: Cuenta, cuenta

C. A.: Pues con Chorche Paniello, de Monzón. Tamién ta Prexinallo Verde, que yera una revista en aragonés. Yo siempre refirmo as cosas minoritarias. Tamién en Barcelona ta La Vispra Samboyana…

 

Una rispuesta a Carlos Azagra: “Antis más bi heba censura politica y agora bi’n ha d’economica”

  1. Pingback: Carlos Azagra: “Antis más bi heba censura politica y agora bi’n ha d’economica” | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.