Carlos Fabra, condenau a quatro anyos de prisión por delitos fiscals

O president d'a Diputación y a exmuller heban deixau de chustificar uns ingresos por valor de 3,2 milions d'euros entre 1999 y 2004

Carlos Fabra. Foto: Partiu Popular d'a Comunidat Valenciana (CC-BY)

Carlos Fabra. Foto: Partiu Popular d’a Comunidat Valenciana (CC-BY)

L’Audiencia de Castellón ha condenau a quatro anyos de prisión a l’expresident d’a Diputación de Castellón y expresident provincial d’o PP, Carlos Fabra, por quatro delitos contra a hicienda publica en o clamau ‘caso Naranjax‘, seguntes ha informau o Tribunal Superior de Chusticia valenciano a traviés de Twitter. Fabra habrá de pagar una pinyora de 693.000 euros y indemnizar a hicienda con a mesma cantidat. A exmuller de Fabra, María Amparo Fernández, ha estau condenada por dos delitos fiscals y habrá de pagar 274.000 euros de pinyora y indemnizar a hicienda con a mesma cantidat.

En cambeo, l’Audiencia ha absuelto a Fabra, a l’interpresario Vicente Vilar y a la exmuller d’iste d’os delitos de retoque y trafico d’influencias.

Entre a lectura de conclusions, a final de mes pasau, a fiscalía manteneba a petición d’una condena de dica 13 anyos de prisión ta Fabra porque consideraba que o chuicio heba acreditau que yera culpable d’os delitos de trafico d’influencias, retoque y qualques delitos fiscals. A resta d’acusacions tamién mantenió as penas pedidas en prencipiar o chuicio. A defensa de Fabra, exercida por l’advogau Javier Boix, pidió l’absolución en considerar que no i heba delitos probaus y que os delitos fiscals habrían prescrito.

Os peritos d’Hicienda confirmoron que heba ingresau 3,2 millons d’euros sin chustificar

O chefe d’a unidat d’emparo de l’Achencia Tributaria a la Fiscalía Anticorrupción, Conrado Caviró, sinyaló a final d’octubre que l’expresident d’a Diputación de Castellón, Carlos Fabra, y a suya muller heban deixau de chustificar uns ingresos por valor de 3,2 millons d’euros entre 1999 y 2004.

En a suya declaración chudicial en a vista, Conrado Caviró dició que d’ista cantidat, un total de 3,05 millons d’euros estioron ingresaus en efectivo en belunas d’as 85 cuentas corrients que teneban ubiertas. O perito sinyaló que i heba un ‘gran desfase’ entre as vendas en efectivo, os premios de lotería y as rentas salarials d’o matrimonio con que Fabra chustifica istos ingresos.

O PP valenciano respecta a sentencia

O portavoz d’o grupo parlamentario d’o PP en as Cortz Valencianas, Jorge Bellver, ha manifestau o suyo respecto con a sentencia que condena a Fabra. Bellver ha dito que o PP ‘ye respectuoso con as sentencias’ y ha guarenciau que ‘ni dende o grupo parlamentario ni o PP pedirá garra indulto‘ ta Fabra. O portavoz d’o PP ha feito istas declaracions dimpués d’a polemica d’a semana pasada porque mas de quaranta diputaus d’o suyo grupo pidioron l’indulto ta l’exdiputau y exalcalde de Torrevieja, Pedro Hernández Mateo, condenau a tres anyos prisión por corrupción.

Fuent: http://www.vilaweb.cat/noticia/4158214/20131125/carlos-fabra-condemnat-quatre-anys-preso-delictes-fiscals.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.