Carlos Pulgar: “Sin a oficialidat, o futuro d’a luenga asturiana ye desapareixer”

Entrevistemos a o representant d'a Xunta pola Defensa d'a Llingua Asturiana en as XX Chornadas d'a luengas d'Aragón

Carlos Pulgar en as Chornadas por as luengas d'Aragón

Carlos Pulgar en as Chornadas por as luengas d’Aragón

En o marco d’as XX Chornadas d’as luengas d’Aragón, organizadas por l’Asociación Cultural Nogara – Religada, Carlos Pulgar, representant d’a Xunta Pola Defensa d’a Llingua Asturiana, concedió una entrevista ta Arredol feita en aragonés y asturiano. Ista luenga, igual como l’aragonés no tien l’estatus d’oficial en Asturias, encara que sí que tien bella lechislación tocant a l’amostranza y a l’emplego institucional, y un mayor numer de fablants.

¿Quál ye agora mesmo a situación d’a luenga asturiana?

Legalment a situación ye a mesma que dende fa prous anyadas. As leis que protechen l’asturiano son o propio estatuto de 1981, a on que nomás diz que será protechiu y dimpués una lei de protección, emplego y promoción d’a luenga de 1998, que ye una lei más gran que tracta muitos temas: l’amostranza, os meyos de comunicación, emplego institucional… Lo que pasa ye que ye una lei que en o 90% d’as cosas no se cumple.

Ye una lei que deixa a la voluntat politica practicament tot. Mete que “podrá fer-se isto, podrá fer-se isto atro”… cosas que pueden fer-se, pero que a la fin no se fan. L’unico punto que se cumple a meyas ye o d’a toponimia que sí que diz que os toponimos d’Asturias habrán de tener a suya denominación oficial en a forma que diz “tradicional”, que ye l’asturiana. Agora se ye en un proceso de revisión d’a toponomia y se ye declarando oficial. 50 concellos de 78 tienen un decreto que declara oficial ixos toponimos.

Ixo ye la declaración, dimpués vien o cumplimiento, que ye menor. L’administración en bells casos cumple, en bells atros no pas. As interpresas y os meyos de comunicación publicos tamién en bells casos cumplen y en ells atros no pas. En a mayoría no. A lo menos iste ye un aspecto que se cumple a meyas.

Charrando de lechislación europea, l’estau espanyol ye sinyant d’a Carta Europea d’as Luengas Minoritarias y Rechionals d’o Consello d’Europa y por ixo, de cabo ta quan fan unos ciclos de revisión d’o grau de cumplimiento. Creigo que somos en a mesma colla que l’analís que fan de l’aragonés.

Pero totz sabemos como son istas qüestions europeas. Ye una qüestion que l’estau sinya de traza voluntaria y alavez y Europa fa una mica de seguimiento pero tampoco no va a pretar guaire si no se cumple lo que se sinya. Como l’estau sinyó voluntariament, s’estiman más que l’estau i contine como sinyant, que pretar muito as tuercas en ixe sentiu.

Dende l’anvista churidica, a situación ye prou aturada. A prencipios d’iste sieglo s’ubrioron os procesos de reformas d’os estatutos. En Asturias prencipió ixe proceso pero nunca no fué entabant. Se facioron reunions pero no se cambió l’estatuto. Alavez, de novedatz churidicas no bi’n ha que las que plegan dende bellas sentencias. Bi habió bellas sentencias, tanto d’o constitucional como d’atros tribunals sobre temas tanchencials como l’emplego que pueden fer d’a luenga os funcionarios en o suyo puesto.

Tamién bi habió una ta sacar as ratios en o sistema educativo. En teoría tot qui demande luenga asturiana en a escuela ha de tener a capacidat d’estudiar-la, pero dimpués l’administración meteba unos ratios minimos de ueito alumnos en primaria y secundaria. Bi habió sentencias ta sacar ixos ratios. Con que uno lo demande, ha de dar-se l’asignatura. Todas las modificacions de l’estatus churidico que bi ha habiu en a zaguer decada son estadas vía sentencia churidica.

En a demba social s’ha enantau en istas zaguers anyadas en a consciencia social, en que a la chent le fa más goi a luenga y conoix millor a literatura. Tamién a traviés de bells programas de televisión conoix bellas questions relacionadas con a luenga. Manimenos ixos trangos entabant a ran social no se sustancioron en cambios más fundos. Un porcentache muito altero d’a población viye positivament a luenga, pero d’astí a que ixo condicione votos u atras cosas… ixe blinco no s’ha dau.

Yo creigo que somos en un inte de reactivar a la sociedat ta demandar lo basico: a reforma estatutaria, conseguir a oficialidat y unas politicas de normalización que den a posibilidat a la luenga de sobrevivir en as venient cheneracions.

¿Qual ye a faina que fa la vuestra organización, a Xunta Pola Defensa de la Llingua Asturiana?

Somos una colla de personas, que lo que prebamos de fer ye fer vistera la luenga y de conectar con a sociedat. Dende que se fundó a Xunta, en 1984 – somos quasi fendo lo trenteno cabo d’anyo – todas as actividatz y accions estioron endrezadas ta conseguir ixos obchectivos: d’una man conseguir o status churidico d’igualdat con o castellano que ye a oficialidat y d’atra man, conseguir que os poders publicos se comprometan a fer as politicas que cal ta guarenciar a supervivencia d’a luenga en dembas alazetals como en son os meyos de comunicación, sistema d’amostranza, emplego institucional, toponimia, …

Nos consideramos una parti d’o movimiento de reivindicación lingüistica que tien como obchectivo movilizar, fer vistera la luenga y fer que a chent prenga consciencia d’o periglo en que ye a luenga y que conoixca as midas que se han de prener ta guarenciar-le un futuro digno.

A tamás de no estar oficial, l’asturiano s’amuestra y tien bell status churidico. Manimenos continantz demandando a oficialidat ¿creyes que ye menister a oficialidat? ¿qué avantallas tien?

Como dices, dimpués de muitas anyadas de presión y reivindicación se consiguió bella presencia en os sectors claus: amostranza, meyos de comunicación, etc… pero siempre ye una presencia marchinal. Ixa situación entendemos – y tot qui lo analice con bella seriedat pensa lo mesmo – que no asegura o futuro d’a luenga.

No nos planteyamos a oficialidat como l’obchectivo zaguer, que quan se consiga ya ye tot feito, sino que ye un trango que simplament cal ta guarenciar o futuro de l’asturiano. Ye decir, con oficialidat a luenga podrá sobrevivir u no pas, pero sin a oficialidat, que no ye que a igualdat de dreitos de os fablants de asturiano y castellano, o futuro d’a luenga ye desapareixer.

Una comunidat lingüistica, en o contexto que somos, ha d’aspirar sí u sí, a la igualdat de dreitos y dende ixa plataforma prebar de asegurar o futuro.

En Asturias, a diferencia d’Aragón, no bi ha partius rechionalistas u nacionalistas con gran representación en o parlamento. ¿Astí se ha politizau en bella mida a luenga? ¿Como ye a relación entre luenga y politicos?

Bueno, mientres os 90 sí que bi habió representación d’o Partiu Asturianista con un diputau mientres dos lechislaturas. Dimpués tamién partius como Izquierda Xunida d’Asturias que tien representación en a Xunta Xeneral esfiende qüestions como a oficialidat d’a luenga, a lo menos sobre o papel.

Sí que ye verdat que contimparando con atros puestos truca o ficacio que a presencia de partius nacionalistas ye relativament baixa. En Asturias dende a transición, quasi o 90 % d’o tiempo ha gubernau o Partiu Socialista en a suya versión asturiana FSA-PSOE, u con mayoría absoluta u con pactos con Izquierda Xunida en bell inte.

Nusatros lo que siempre miramos de fer ye fer viyer que una luenga ye patrimonio de todas las personas y todas las collas y que la habrían d’esfender todas as collas independientement de l’espectro politico que se’n muevan. Isto lo faciemos porque creyemos que cal que se faiga asinas y por fer d’a necesidat virtut, porque os partius con mayorías grans no lo viyeban asinas.

A politica que han feito PSOE y o PP quan i ye estau ye de corrección politica, de decir “Sí, sí, cal promocionar y cal fer-lo servir y tal y qual” pero dimpués en a realidat, ni s’enanta en o tema churidico ni se fan trangos en o tema real.

Ye verdat que en o plano politico no bi ha habiu formacions politicas que fesen mover-se a las collas mayoritarias d’as suyas posicions.

En Aragón tamién hemos teniu, y tenemos, bells problemas quanto a la normativización d’a luenga aragonesa. ¿En Asturias hetz teniu u tenetz o mesmo problema?

No… Os expertos y os filologos siempre dicen que a lo menos entre todas as dificultatz que tien ta sobrevivir l’asturiano, afortunadament a qüestion normativa no ye un gran problema. Sí que bi habió, como en totz os procesos de normalización, en as anyadas 80 bellas polemicas arredol d’a grafía y tal, pero agora ye un tema superau.

Practicament totz os textos que se fan siguen a normativa academica que tot lo mundo leva con prou normalidat. Como todas las normativas cuento que muita chent considerará que bi ha cosas amillorables, pero no ye un d’os temas en l’achenda d’a reivindicación. Mirando-se agora as polemicas d’ixas envueltas yo creigo que no teneban guaire sentiu.

Una d’as campanyas que más ha trucau lo ficacio en as vuestras movilizacions ye a de Pita, una pirina que encorreba a los politicos ta remerar-les l’asturiano. ¿cómo le va?

Ye curioso porque levaba tiempo retirada pero habió d’actuar fa poco. Habió d’ir t’a Xunta Xeneral por una declaración de l’antigo president d’Asturias Vicente Álvarez Areces, que yera un d’os personaches preferius de Pita. A pirina ye un personache encara activo y que cheneró en a memoria colectiva y popular un gran revilcar. Nusatros mesmos somos sorprendius porque en muitos puestos a chent nos demanda que i vaiga Pita. Y la hemos de cudiar que ye un personache que tien más de diez anyadas que, ta ista mena d’accions ye muitismo. Tú te miras atras accions d’ista mena que fan atros y son personaches que tienen muit poqueta vida. Duran cosa de semanas u meses.Pita tien un gran “tirón”.

En as zaguers eleccions americanas, o candidato republicano fació unas declaracions decindo que iba a retallar en os presupuestos d’a televisión publica. Alavez, iba dezaga d’ell la que aquí clamamos la Caponata y bells atros personaches ta bells actos. Ixo no duró que bells diyas. En a prensa asturiana meteban fotos contimparando a la Pita y a la Caponata mientres ixos diyas. Ixo duró muito poco. Manimenos a Pita tien una vida muito larga y que contina dando rendimiento en a memoria colectiva.

Agora tamién, con o tema d’os escraches y tal, muita chent lo contimparaba. Ye verdat que yera una modalidat d’acción que siempre se feba en presentacions publicas, ye decir, quan o cargo publico yera exercendo como tal, pero ye verdat que ye muito parellano. No se qui tien o copyright d’a ideya, si yeran os archentinos u qui, pero somos disposaus a viyer qui lo inventó porque talment estiemos nusatros y nian en paremos cuenta.

Nusatros siempre estiemos por una movilización social más adintro d’o “repertorio clasico”, por clamar-lo de bella traza, pero ista acción ya ye una cosa postmoderna, u post-postmoderna, no sé como clamar-lo. Estió una adaptación t’os nuevos tiempos y estió tot un exito. Conoixen a Pita en toz os cabos y te’n preguntan por ella en muitos puestos: que qué tal ye, que qual será la venient que faiga… Ye una pena no tener ideyas d’istas más a soben.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.