Catalunya clama por a suya independencia en o día d’a Diada

Cerca de 2 millons de personas ha participau en a formación d'una gran V, simbolizando o dreito a votar en o referendum d'independencia y a victoria

Foto: Josep Mª Grau. (CC-BY-NC) https://www.flickr.com/photos/assemblea/15186829656/

Foto: Josep Mª Grau. (CC-BY-NC) https://www.flickr.com/photos/assemblea/15186829656/

Una gran bandera catalana en forma de V ha estau debuixada hue en Barcelona por 1.800.000 personas seguntes a Guardia Urbana d’a ciudat condal (3 millons seguntes l’Asamblea Nacional Catalana, ANC) en o día d’a Diada catalana que commemora a cayida de Barcelona debant d’as tropas borbonicas en a Guerra de Sucesión, que metió fin a la independencia de Catalunya. Con ista chigant V s’ha quiesto demandar a independencia y o dreito a votar en o futuro referendum d’o 9 de noviembre, menazau por as institucions espanyolas.

11 kilometros y 73 tramos encabezaus por una pancarta que deciba “9N Votaremos. 9N Ganaremos” y en que i yeran Carmen Forcadell, presidenta de l’ANC, y Muriel Casals, president d’Omnium Cultural, chunto a miembros d’o Gubierno catalán y de partius politicos.

A las 17:14 h., representando l’anyo d’a redota catalana, as dos linias (Diagonal y Gran Vía) d’a V han confluiu en a Pza. d’as Grorias, momento en que una zagala de 16 anyos (edat minima pa votar en o referendum d’independencia) ha ficau una papeleta en una urnia, simbolizando a voluntat de poder votar y a victoria. Asinas mesmo, en ixe momento, corals ha interpretau “Ara és l’hora“, de Lluis Llach y o “Cant de la Senyera“. As intervencions politicas han continau con castellers mientres tot o recorriu y intervencions politicas. A las 18:45, “El Cant dels Segadors” ha finalizau a reivindicación.

“Arribaremos dica la fin y ganaremos”

En os discursos, Josep Maria Vila d’Abadal, president de l’Asociación de Municipios por a Independencia, ha reafirmau o compromís d’os municipios con a consulta, realizando mocions en totz os concellos catalans.

Muriel Casals, presidenta d’Omnium Cultural, ha sinyalau que “somos prestos pa votar, no tenemos miedo“. “A voz de Catalunya ye por dencima d’o que diga un tribunal de Madrit”.

Carme Forcadell, presidenta de l’Asociación Nacional Catalana, ha proclamau que “hemos convertiu o tricentenario d’a redota en o primer anyo d’a victoria“. Ha instau a o parlamento y a o president catalán a meter as urnias o 9N. Forcadell ha declarau que “agora ye a hora d’a verdat, d’os ciudadanos. Totz y cadagún de nusatros hemos de fer-nos voluntarios d’o nuevo país”. “Ha arribu a hora d’as decisions excepcionals. Demandamos a os nuestros representants politicos que deixen a un costau os intreses de partiu y que actúen d’alcuerdo a o momento y transcendencia historica que somos vivindo. Somos garants d’a unidat. No hemos arribau dica aquí pa ir-nos-ne ta zaga y perder a valor. Arribaremos dica la fin y ganaremos“.

Posteriorment, unas 50.000 personas ha marchau en una manifestación d’a cucha independentista catalana (CUP, Endavant, Arran, SEPC) con o lema “Desobedeixemos por o referendum. Por a independencia d’os Países Catalans“. I ha habiu manifestacions por a independencia y o dreito a votar en atras localidatz d’a cheografía catalana, tamién con exito de participación.

Muit poca participación en os actos unionistas

Amás d’a reivindicación independentista, i ha habiu reivindicación pa que Catalunya contine estando parte d’o Estau espanyol. Arredol d’uns 40 neonazis ha marchau por a Rambla d’o Raval protechius por os Mossos d’Esquadra, debant d’a presencia d’uns 200 antifaixistas.

En Tarragona s’ha desenrrollau una manifestación unionista con quantos centenars de personas, con militants y dirichents d’o PP, UPyD, Ciutadans, bell socialista como Carme Chacón y organizacions d’ultradreita.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.