Centenars de personas amuestran en Sangüesa a suya oposición a o recreiximiento de Yesa

Charradas y una manifestación se realizoron o sabado en Sangüesa ta demanda a paralización d'o recreiximiento de Yesa

mani-yesa-no-ZANGOZA-15j13

Fotos 1, 3, 4: COAGRET, Foto 2: Martxelo Díaz (Naiz)

A firme oposición contra o recreiximiento de Yesa levó o sabado a centenars de personas a acudir dica a localidat nabarra de Zangoza (Sangüesa) ta participar en a chornada ‘Yesa, por seguridat ni un metro mas. Bi’n ha alternativas‘ organizada por a plataforma Yesa+No Lanak Gelditu con a colaboración de l’Asociación Río Aragón y URA Nueva Cultura de l’Augua.

Entre o maitín se realizoron ponencias sobre os conflictos arredol de l’augua en Nabarra y una charrada arredol d’o Pantano de Yesa con o profesor Jose Manuel Nicolau y a Fundación Nueva Cultura de l’Augua. En a charrada s’explicoron as afeccions de l’actual pantano y s’amostró o prochecto d’alternativas a o recreiximiento.

A las 18.00 horas d’a tarde prencipió a multitudinaria manifestación, baixo o lema “Yesa, por seguridat ni un metro mas. Zangoza arrisku larrian”, que recorrió o casco urbano de Sangüesa en un ambient reivindicativo pero tamién de preocupación debant d’as noticias amaneixidas en os medios de comunicación, respective a os zaguers eslizamientos en a ladera cucha y a posibilidat de que istos s’incrementen a o comienzo d’a campanya de riegos d’a canal de Bardenas.

A manifestación contó por primer vegada con o refirme de l’alcaldía d’a localidat, asinas como os Concellos de Sangüesa, Oibar, Galipentzu en Nabarra y o Concello d’Artieda en Aragón, afectaus dreitament. A convocatoria yera refirmada por mas de 50 organizacions politicas, socials, ecolochistas, entre ellas as aragonesas Aturando Yesa, Coagret, Puyalón de Cuchas, Purna, Jalón Vivo y Río Aragón.

Entre o recorriu se veyoron diversas pancartas y cartels por unos Ríos Vivos, contra o Pantano de Yesa y tamién contra o de Mularroya. Os colectivos chuvenils Purna (Aragón) y Ernai (Euskal Herria) de conchunta con a Gazte Asanblada y Aturando Yesa facioron un bloque uniu dimpués d’o lema “A chovenalla por a esfensa d’a tierra. Gazteria amalurraren defentsan. Esa ez. Yesa no”. Amás, seguntes informa Naiz, en bellas balconadas penchaban flotadors y atros obchectos alusivos a la temor a un accident que provoque que as auguas de l’entibo arrasen Sangüesa.

Ampla presencia d’a cucha independentista aragonesa

Una ampla delegación d’a organización politica independentista Puyalón de Cuchas participó en os actos contra o recreiximiento de Yesa convocaus por a plataforma Yesa+No en a localidat nabarra de Sangüesa.

En os actos estioron presents o Coordinador Nacional Zésar Corella y o responsable d’Acción Politica Chesús Royo. Corella manifestó que “somos en un momento crucial en o qual l’acción colectiva d’os movimientos socials será determinant ta la definitiva paralización d’o prochecto de recreiximiento d’o pantano de Yesa. Os graus problemas de seguridat y risque real ta las personas que mientres iste hibierno s’han veniu presentando son a muestra d’a inviabilidad tecnica y economica, amás de social y medioambiental”.

Seguntes Israel Orera, concellero de Puyalón en a localidat aragonesa d’Artieda, “a manifestación ha estau un chilo d’esperanza y animo ta aquellas localidatz que mientres anyos han sufriu as conseqüencias d’ista obra desproporcionada y sin sentiu”. Cal recordar que a localidat altoaragonesa ye immersa en procesos d’expropiación de tierras de cautivo ta la realización d’o recreiximiento, expropiacions istas que suposarían l’abandono gradual d’a población debant d’a imposibilidat d’o sostenimiento economico, motivo por o qual o concello d’a localidat de conchunta con os suyos vecins y vecinas han amostrau en numerosas ocasions o suyo refuse.

Dende Puyalón de Cuchas aseguroron que seguirán treballando con totz os achents politicos y socials involucraus en a paralización d’iste prochecto.

Fuent: http://arainfo.org/2013/06/cientos-de-personas-muestran-en-zangoza-su-oposicion-al-recrecimiento-de-yesa/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.