CGT acusa a lo gubierno de “planeyar sacar os ciclos de grau superior” en bells lugars d’Aragón

O zarre podría afectar a institutos de Exeya, Utriellas, Pedrola, Tarazona u Calatayú.

L'IES Tubalcain de Tarazona, un d'os posibles afectaus (Foto: IES Tubalcaín)

L’IES Tubalcain de Tarazona, un d’os posibles afectaus (Foto: IES Tubalcaín)

O sindicato CGT (Confederación Cheneral d’o Treballo) creye que “a D.Ch.A. ye planeyando sacar ciclos de grau superior en bells lugars” d’Aragón. Un d’os ciclos con más risque, seguntes CGT, ye o de Mantenimiento de Equipo industrial que agora mesmo s’imparte en Exeya, Utriellas, Pedrola, Tarazona u Calatayú. en o caso d’Utriellas, ye l’unico centro en toda la provincia de Teruel a on que se puet estudiar iste ciclo.

Agora mesmo as matriclas en os ciclos son d’arredol de vinte alumnos en cadagún d’istos centros. CGT prevei que, “por l’actual situación d’ature, ista matricla puyará en cursos posteriors”. “Mesmo aintro d’o contexto de crisi, son alumnos que troban treballo en interpresas d’a redolada con relativa facilidat en contimparando con atras familias profesionals” dicen dende o sindicato, y sinyalan a Endesa, General Motors u Casting Ros, como belunas d’as que encara continan achustando chent con ixos perfils.

CGT  manifiesta o suyo refús t’o zarre d’istos ciclos “más que más quan bi ha centros privaus que les han concertau istas amostranzas. En tot caso caldría sacar antis istos conciertos”. En estar istos estudios en zonas rurals l’impacto sería mayor y “provocará que l’alumnalla haiga de marchar t’as capitals” y “condenará o desembolique economico d’istas redoladas. O sindicato tamién remera que istos centros participan en o programa Erasmus, ninviando alumnalla a puestos como Irlanda, Italia u Francia ta fer-ie practicas.

Os centros ya son fendo accions y replegas de firmas ta que no se zarren istos estudios. Tamién son mirando de conseguir os refirmes de concellos d’as redoladas y d’as interpresas.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.