CGT convoca oficialment vada cheneral t’o 31 d’octubre

CGT convoca oficialment vada cheneral o 31 d'octubre, mientres CCOO y UGT podrían decidir-lo iste viernes 19, convocando t'o 14 de noviembre

Foto: Gabinete de Prensa Confederal de CGT

O sindicato CGT ha rechistrau hue oficialment en o Ministerio d’Emplego y Seguridat Social a convocatoria de vada cheneral t’o diya 31 d’octubre. Ista vada afecta a os treballadors y treballadoras de tot l’Estau espanyol de totz os sectors publicos y privaus.

O sindicato libertario convoca a vada en refuse a las “importants midas antisocials que son ocasionando que un gran parte d’a población se trobe en situación d’emerchencia social”. O suyo secretaire cheneral, Jacinto Ceacero tamién ha comentau que “CGT proposa una vada cheneral inclusiva, laboral, social y de consumo, ye menada ta que la faigan suya a mayoría d’a población, y en a que se den cita y converchan todas as luitas sindicals y socials que en istos momentos se son producendo”. Tamién s’ha referiu a que ista vada ya cuenta con bells refirmes a lo largo de tot l’Estau, tanto de sindicatos como de colectivos socials. Asinas mesmo, “a vada cheneral ye parte d’una movilización que cal mantener en o tiempo contra as politicas antisocials”.

Antiparti, os sindicatos mayoritarios, CCOO y UGT, se planteyan convocar tamién vada cheneral en tot l’Estau o 14 de noviembre, coincidindo con a vada cheneral en Portugal y pocos diyas antis d’atra vada cheneral en Grecia, o diya 18. A convocatoria tendría refirme d’a Confederación Europea de Sindicatos (CES), que convocaría manifestacions y concentracions o diya 14 en atros países europeus. A decisión podría prener-se iste viernes 19.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.