CGT critica a “precarización d’os interinos”

Demandan milloras en as condicions laborals d'os docents y más que más d'os interinos.

IES Itaca (Foto: Concello de Zaragoza)

IES Itaca (Foto: Concello de Zaragoza)

A publicación iste chueves d’as plazas vacants d’interinos docents de secundaria, formación profesional y escuela d’idiomas ha estau criticada por a CGT, organización sindical que afirma que somos, igual como en chulio, debant d’una nueva precarización d’o treballo d’os docents.

O sendicato afirma que “o Departamento d’Educación d’Aragón fragmenta las vacants completas d’interinos en meyas chornadas de treballo u en tercios de chornada” ta fer que pareixca “que por cada curso ufren más plazas y más puestos de treballo, quan en realidat, lo que fan ye precarizar as chornadas laborals, fendo-las a soben, de mal cubrir, por as dificultatz que tien acceptar una chornada de treballo de 6 horas en zona rural”.

CGT se queixa tamién d’a “falacia d’o bilingüismo: “muitas d’as vacants que s’ufren son con perfil de luengas, ye decir que cal tener certificaus oficials d’idiomas ta poder impartir-las. Manimenos en as listas d’interinos bi ha pocos docents que’n tiengan”. En o curso pasau, seguntes informan, bi habió vacants que dioron a vuelta de tot a la lista sin estar trigadas por dengún en no tener a titulación que caleba”. Ta escusar-se iste problema, proposan potenciar a formación d’os docents, ufrindo becas d’estudio u formación en atros paises u ixamplar as plantillas y a ufierta de plazas d’estudio en as Escuelas d’Idiomas.

Ta rematar, CGT tamién se queixa d’o feito de que os interinos s’incorporen nomás dos diyas antes de prencipiar o curso, no podendo aprestar y organizar o curso con a resta de profesors, y causando un perchuicio t’a organización d’os Centros y t’o treballo con as familias y l’alumnalla.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.