CHA alerta d’o periglo de privatización d’as Escuelas Infantils Municipals de Zaragoza

"Si o gubierno baixa en un 70% a suya alportación t'as escuelas, bi habrá graus conseqüencias ta que as familias puedan acceder-ie", declara Leticia Crespo.

Leticia Crespo, concellera de CHA en Zaragoza (Foto: CHA)

Leticia Crespo, concellera de CHA en Zaragoza (Foto: CHA)

“Os centros educativos ta ninos y ninas d’entre 0 y 3 anyadas se trobarán en una situación economica insostenible”. Asinas alertaba a colla municipal de Chunta Aragonesista sobre a posibilidat de que o Gubierno d’Aragón decida baixar l’alportación anyal ta istos centros en l’anyada venient. Lo feba dimpués de una reunión d’o Consello d’o Patronato d’Educación y Bibliotecas.

O Gubierno tien previsto baixar en un 70% a subvención de quasi 900.000 euros que ista anyada ha alportau ta mantener ixos centros. Seguntes CHA, istos centros son en teoría de tot responsabilidat d’a D.Ch.A., pero manimenos existen por iniciativa y mantenimiento municipal. “Nos tememos, dimpués de conoixer istas intencions, que o Gubierno Autonomo afogue economicament istos centros y, d’ista traza, chustifique una futura privatización de todas as escuelas infantils de Zaragoza debant d’a imposibilidat de mantener-las quan a reforma d’a Lei de Bases saque de traza finitiva ista competencias d’os concellos, asegura Leticia Crespo, concellera d’a formación.

Istas escuelas infantils municipals “tasament pueden cubrir una minima parti d’a necesidatz d’escolarización d’os ciudadans de 0 a 3 anyadas en Zaragoza, como ye esclatero en l’estudio de previsión de necesidatz futuras d’esquipamientos educativos presentau en o zaguer Consello Escolar Municipal de Zaragoza”, aclaren dende o partiu. En iste estudio, antimás se afirma que cal construyir una escuela infantil en Val d’Espartera que daría servicio a Rosales del Canal, Montecanal y Arcosur y Parque Goya, ya que as escuelas infantils existents más amanadas ta istos vicos ya rebuten por a población más amanada.”

“Ye penible que o Gubierno d’Aragón no siga sensible con as necesidatz educativas y de conciliación d’a vida familiar y laboral d’a ciudadanalla zaragoza”, diz Leticia Crespo, “y en cuenta de puyar a financiación d’iste servicio publico educativo lo ye albandonando igual como fa con l’amostranza publica en tot Aragón.”

Debant d’ista situación, CHA ha demandau a lo gubierno que, antimás de no baixar a subvención, prenga a suya responsabilidat con iste servicio y financie en condicions istos centros que permiten a muitas familias con rentas chicotas conciliar la vida familiar con a laboral.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.