CHA demanda a declaración de zona catastrofica t’os lugars afectaus por as creixidas d’o Martín

Encara ye en busca a persona desapareixida iste sabado

A creixida por Oliet (Foto: @Juanjo_Toledo)

A creixida por Oliet (Foto: @Juanjo_Toledo)

Entre que encara se son evaluando as esferras feitas por as creixidas d’os ríos Martín, Seco y Armiellas, a Colla Parlamentaria de Chunta Aragonesista (CHA) han rechistrau tres iniciativas parlamentarias ta que se declare toda la redolada “zona catastrofica”, ta que se den as aduyas que pertoquen t’os lugars más afectaus y ta que se faigan explicacions d’a magnitut y posibles causas d’a esferra.

O Secretario Territorial d’o partiu ta Teruel ha declarau que “encara que continan valurando-se danyos y mirando a la persona desapareixida, ye de dar que as esferras en serán prous, ya que bi ha muita infraestructura publica estricallada de tot por a creixida u que ha quedau en un estau penible. Retes de suministro d’augua, transformadors, pasarelas, muros de contención cauces y parti de vías publicas han quedau estricalladas de tot”.

“Ye estau una barbaridat, no se remeran creixidas tan granizas en as redoladas teruelanas en as zaguers decadas”, ha adhibiu Nieves Ibeas, Portavoz de CHA,  qui ha rechistrau una Proposición no de Lei ta que a población conte con tot lo refirme d’os poders publicos. “As viviendas y biens particlars que s’han visto seriosament danyaus en son muitos, por ixo demandamos a lo Gubierno d’Aragón que dé lo maximo refirme a istas redoladas y os suyos habitadors, y que s’endrece t’o Gubierno Central con a fin de que se tramite a declaración de “zona catastrofica” y se consigan antis con antis as aduyas economicas que calgan ta tirar entadebant”.

En o Baixo Aragón encara son prebando de quantificar as esferras feitas por as creixidas d’iste pasau sabado que afectoron más que más a los lugars de Oliet, La Foz de la Viella y Arinyo y que facioron desapareixer a una persona que encara ye en busca.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.