CHA demanda que o Gubierno asuma ra financiación de ro colechio de Sallent de Galligo

L'actual Colechio d'Educación Infantil y Primaria no cuenta con prou espacio, por o que ye urchent que empencipien as obras d'o nuevo centro, quala financiación ha d'estar asumita a o 100 % por o Gubierno d'Aragón.

Casa de ro lugar de Sallent de Galligo (Foto: Biquipedia)

O deputato vocero d’Educación de CHA, Gregorio Briz, esfenderá iste viernes en a Comisión d’Educación d’as Cortz que o Gubierno d’Aragón asuma ra financiación y construcción integra d’un nuevo Colechio publico d’Educación Infantil y Primaria en Sallent de Galligo. As actuals infrastructuras educativas, que datan de 1964, no pueden responder de traza adequada a ras necesidatz de ra zona, porque son obsoletas y s’han quedato chicotas debant de l’aumento de ra demanda, derivata de l’aumento de población choven en Sallent en os zaguers anyos.

CHA plantia ista proposición no de lei porque no ye d’alcuerdo con que o Concello de Sallent haiga de sufragar una infrastructura educativa que ye competencia exclusiva de ro Gubierno d’Aragón.

A edificación de ro nuevo centro educativo yera incluita en o convenio que en 2008 sinyoron o Concello y Aramón ta enamplar l’actual urbanización d’a estación d’esquí de Formigal con 1.200 viviendas y 400 plazas hoteleras. Dito convenio se modificó posteriorment, y s’alcordó que o Gubierno bi aportarba un 80% d’a financiación y ro Concello o 20% de ro coste total que poderba puyar a 3,2 millons d’euros. Fa un anyo, ro pleno municipal aprebó un nuevo texto seguntes o qual Aramón abanzarba os 640.000 euros que le correspondeba bosar a Sallent, y le serban reintegratos en un plazo de 8 anyos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.