CHA demanda que o manuscrito d’os fueros torne t’Aragón

Atros documentos aragoneses tamién son en a Biblioteca Nacional d'Espanya. Soro critica o silencio de Rudi.

Imachen d'o manuscrito (BNE)

Imachen d’o manuscrito (BNE)

“Un troz de totz nusatros ye en a Biblioteca Nacional”. Asinas s’expresaba Jose Luis Soro, president de Chunta Aragonesista, sobre o manuscrito d’o sieglo XIII que donó ista semana un particlar a la Biblioteca Nacional d’Espanya (BNE). CHA ha demandau que ixe documento torne t’Aragón en estar “parte esencial d’a nuestra identidat”.

CHA demandará en Cortes Aragonesas, con una proposición no de lei, que o Gubierno d’Aragón faya as chestions que calgan ta que o manuscrito d’o sieglo XIII sobre os Fueros d’Aragón donau a la BNE torne fisicament ta Aragón. Tamién reivindica que torne o primer libro impreso por a zaragozana Juana Millán, en o sieglo XVI, que a debantdita Biblioteca adquirió fa bells meses. Juana Millán, antimás d’estar a primer impresora aragonesa, estió a seguna muller que firmó un producto d’imprenta en a Peninsula y a primera que lo fació con o suyo nombre.

Jose Luis Soro ha criticau o silencio de Rudi: “Ta ella ya ye bien que [o documento] siga en Madrit. Ta nusatros no. Ta nusatros ha d’estar en Aragón”, y planteya un scenario hipotetico: “Preixinatz que en cuenta d’haber-se donau a la Biblioteca Nacional s’hese donau a lo Museu Nacional d’Arte de Catalunya“, diz Soro, qui adhibe “Lo que queremos ye un gubierno que esfienda Aragón siempre, no nomás quan as enrestidas plegan de l’este, sino quan as enrestidas plegan dende qualsiquier cabo”.

Tamién o diputau de CHA, Gregorio Briz ha criticau as razons d’o Gubierno d’Aragón en anteriors casos parellanos. “No nos sirve que o Gubierno d’ARagón diga que en a Biblioteca Nacional se consevan os eixemplars en as millors condicions (…) porque decir ixo ye tanto como decir que totz os biens aragoneses que son difuera d’Aragón, si son bien conservaus, no cal que tornen, incluyius os d’as parroquias d’as comarcas orientals aragonesas, sobre los que iste Gubierno sí ha planteyau baralla”.

 

Una rispuesta a CHA demanda que o manuscrito d’os fueros torne t’Aragón

  1. Pingback: CHA demanda que o manuscrito d’os fueros torne t’Aragón | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.